منی مردم زندگ مان اَنت
( لیلہ ھالد ءِ سر گْوست )
پیسرگیں بھراں چہ اد ءَ بہ وان اِت :
چہ آئی ءِ درکپگ ءَ ، من پد ءَ گوں تْرندیں گالوارے ءَ گپ بندات کرت ءُ ھمے زور دات کہ من ءَ بہ نبیس ءُ بہ دے کہ مئے پاسپورٹ ھلاس کنگ نہ بہ اَنت۔ من آئی ءِ جتگیں بھتام نہ من اِت اَنت ءُ وتی دپ ءَ در اتکگیں گپ ءِ دوبر نہ کنگ ءِ کول کرت ، من گوں مارشتے ءَ سپیر ءِ پجیگ ءَ نشت ءُ اربی کاپی وارت۔ ما انگریزی ءَ گپ کنگ ءَ اَت اِیں ، من کمو تیز گپ کنگ ءَ اَت آں ، آ ھمے سرپد بوت کہ من اربے نہ آں۔ چہ در کپگ ءَ پیش من گوں آئی ءَ اربی ءَ گپ کرت ءُ ھمے پیش داشت کہ من اربے آں۔ پلستینی یے آن ءُ پلستینی جنین زوت آشوبے ءِ تہ ءَ جْوانیں کردے پیلو کن اَنت۔ آئی ءَ منی گپ اش کرت اَنت ، بچکند اِت ئِے۔
ھمے بھارگاہ ءِ موسم ءَ من پہ جنین بیگ ءِ سبب ءَ جیڑھانی دیمپانی بوت آں۔ اے این اے ءَ سوڑگ کرتگ اَت کہ زانشتجاہ ءِ نودربر لشکری ھیلکاری دیگ بہ بہ اَنت۔ من ھم لوٹ کنوکیں بنداتی ٹولی ءَ ھوار اَت آں، من چہ وتی سیاسی کارشونیانی بنیاد ءَ اے گپ ءَ دلجم اَت آں کہ نوں منی لوٹ ھچ وڑیں سبب ءَ رد کنگ نہ بیت۔
چوش کہ من اے یو بی ءُ جی یو پی ایس ءِ واکدارانی کمیٹیاں ھوار اَت آں، پمشکا منی نام ءِ رد کنگ جیڑھے ودی کنگ اَت۔ نوں آیاں دگہ زوراکی یے چکاس اِت ءُ منی رد دیگ بندات کرت کہ موسم ھراب اِنت ، من سگ اِت نہ کن آں پمشکا چہ ھیلکاری ءِ روگ ءَ وت ءَ دور بہ دار آں۔ من آیان ءَ ھمے دلبڈّی دات کہ من ھرچ وڑیں سکیاں سگ اِت کن آں، گڑا آیاں من ءَ رزا دات۔
زانشتجاہ ءَ سیاست ءِ سر ءَ پابندی اَت ، بلے پہ اے این ایم ءَ اھوتی کار ھم کنگی اَت۔ من ءَ جیویٹ ھال ءَ لٹریچر بھر ءُ بانگ کنگ ءُ ھمے ھند ءِ درچکاں پوسٹر جنگی اَت۔ من شپ ءِ ادار یک یا سھب ءِ پنچ ءَ اے کار کرت۔ یک شپے من ءَ پھازدار ءَ گپت اولی ءَ آئی ءَ من ءَ ترسینت ءُ بیھار دات رند ءَ آمئے چیریں گل ءِ کارکنے بوت، پد ءَ من ءَ ھمائی ءَ سرپد کرت کہ کجام جاہ ءَ کجام وھد ءَ پوسٹر جنگ لوٹ اَنت۔
اگاں من راستی ءَ گرگ بوتین آں گڑا ابید جست ءُ پُرس ءَ چہ زانشتجاہ ءَ کشگ بوت آں۔ نوں من جیویٹ ھال ءَ پہ دلجمی کار کرت۔ جنینانی ڈاک ءِ ڈبیانی تہ ءَ بنڈلانی بنڈل ایرکرت، ھمیشانی پجیگ ءَ پنتاکے ایر کرت داں زانگ مہ بیت کہ اے دوئیں چیزانی ایر کنوک کے اِنت۔ برے برے مئے بچک ھمے گوشگ ءَ آتکگ اَنت کہ اے دوئینانی لیکھانی زانگ ھژدری اِنت۔ آیانی اے گپاں من ءَ آیانی جیڑگ ءِ بارو ءَ سرپدی داتگ۔
نودربر منی بارو ءَ داں گڈی وھد ءَ زانگ ءَ نہ اَت اَنت کہ من چونیں چیریں گلے ءِ کارکن آن ءُ راجدوستے آں۔ بلکیں واکدار اے گپ ءَ دلجم اَت کہ جیویٹ ءَ راجدوست روشت ءِ گچین ءُ جوانیں منوگرے ھست۔ من وھدے اسرائیل ءِ پازدھمی سالروچ ءَ لٹریچر ءِ بھر ءُ بانگ ءَ اَت آں روچ ءَ کار کنگ ءَ گندگ بوت آں ڈین ءَ من ءَ کارگس ءَ لوٹ اِت۔
ڈین ءَ من ءَ امریکی گالوار ءَ گوں تْرندی ءَ گپ کرت۔ من گْوشت کہ من پھمگ ءَ نہ آں، آئی ءَ زھر ءَ گوشتگ کہ تو چونیں نابودے ئے، امریکن زانشتجاہ ءِ نودربرے ءُ تو انگریزی گپ جت نہ کن ئے۔
آئی ءَ دگہ یکے لوٹائینت داں مئے میان ءِ گپاں رجانک بہ کنت ءُ من ءَ گْوشت ئِے کہ تو پہ نودربراں شنگ کرتگیں دستی کتاب ( ھینڈ بک) نہ ونتگ؟ ، من گوشت “جی من ونتگ” آئی ءَ رجانکار ءِ پارست ءَ گْوشت کہ زاناں تو سرپد نہ ئے کہ آرٹیککل نمبر شش ءِ رد ءَ بے موکل ءَ لٹریچر ءِ بھر ءُ بانگ کنگ ءِ میار تو چہ زانشتجاہ ءَ کشگ بہ ئے؟
( روان اِنت … )
