بالاچ نمیران اِنت بالاچ سلاہ بند اِنت
بالاچ مدام کوھاں ھوکانی شکار ءَ کنت
اے گشتن کْوھنیں گوشتنے کہ پہ بالاچاں گْوشگ بوتگ مرچی اے گشتن ھما رنگ ءَ پدر بوتگ کہ بالاچ مرگ ءَ رند ھم جنگ کن اَنت گھگیری کن اَنت۔ بلوچ راج ءِ تہ ءَ بالاچ نام گْوستانکی نامے کہ بلوچ راج ءِ تہ ءَ ھزاراں بالاچ نام ءِ مردم ھست اَنت ءُ بلوچ ءِ گْوستانک ءِ تہ ءَ بالاچ نام ءَ مزنیں شرپ ءُ ازتے دیگ بیت کہ بالاچ نامیں مردم مدام وتی راج ءِ درد واری ءَ ساڑی بوتگ اَنت ءُ مدام دژمن ءِ تیرانی دیمپان بوتگ اَنت۔
اگاں من شھید بالاچ مری ءَ چہ بندات بہ کن آں منی ھیال ءَ بلوچ راج ءِ تہ ءَ سک ءَ باز بالاچ شھید کنگ بوتگ اَنت کہ آ ھما بالاچ بوتگ اَنت پہ وتی راج ءِ پاسبانی ءَ ھرچ وڑیں سکیانی دیم ءَ اوشتوک بوتگ اَنت۔ انچوش کہ بالاچ مری بوتگ کہ آ بلوچ راج ءِ راھشون ءُ بلوچ آجوئی لشکر (بی ایل اے) ءِ سروک بوتگ۔ آئی ءَ پہ وتی راج ءُ گلزمین ءِ آجوئی ءَ سلاہ زرتگ ءُ گوں زورگراں جنگ داتگ ءُ شھمیری ءِ راہ در گیپتگ۔
ھما بالاچ ءَ بہ گر داں مروچی ، بلوچ راج ءِ ھمک بالاچ زورگریں ریاست ءِ تیرانی آماچ اَنت ھمے بالاچ اَنت کہ دژمن ءِ تیر ءِ ورگ ءَ تیار بوتگ اَنت بلے پہ وتی راج ءُ گلزمین ءِ سوداگری ءَ تیار نہ اَنت ، گوں وتی گلزمین ءَ بے وپائی نہ کن اَنت۔ کجام بلوچ ءَ کہ وھدے بالاچ ءِ نام وتی زھگ ءَ داتگ گڑا آ زھگ ءِ پس ءَ وتی دل ءَ اے واھگ ھم داشتگ کہ منی زھگ بالاچ وتی راج ءِ پھاز داری ءَ کنت ءُ آ پِس ءِ دل ءِ واھگ ھم سرجم بوتگ اَنت کہ آیانی بچ بالاچ پہ زمین ءَ ندر بوتگ اَنت۔
انچوش کہ شھید بالاچ ء مولا بکش کہ مھنت کشیں ورنایے بوتگ۔ چیزے روچ ءَ پیسر بلکیں ھمے بالاچ ءُ مولا بکش ، بلکیں آئی ءِ میتگ ءِ سرجمیں مردماں ھم نہ زانتگ کہ بالاچ مولابکش کے اِنت بلے مروچی ھما بالاچ گھگیری ءِ چیدگ جوڑ اِنت۔ آ وھد ءَ بالاچ زندگ بوتگ بلکیں ما کس ءَ اے سما نہ بوتگ کہ بالاچے کئیت ءُ کلّیں بلوچ راج ءَ چہ واب ءَ پاد کنت ءُ گھگیری ءِ راہ ءَ پیش دار ایت۔
ھما کار کہ ما زندگیں مردماں کنگی بوتگ ھما کار بالاچ ءَ چہ وتی مرگ ءَ رند کرت۔ ھما بالاچ ءِ جون اَت ھپت روچاں داں شھید پدا چاراہ ءَ ایر بوت ءُ زندگیں مردم سما پرینت اَنت ئِے ءُ پد ءَ گلزمین ءِ میار بوت ۔ گلزمین میار بیگ ءَ پد ھم نوکیں زرمبشتے جوڑ بوت ءُ سجھیں بلوچ راج ئِے یکجاہ ءُ ھم پت کرت۔
بالاچ کہ زیکیں روچ ءَ ھرچ کس ءَ تھنا بالاچ ءِ نام ءَ زانتگ مروچی ھمک بلوچ گْوش ایت کہ بالاچ گھگیری ءِ چیدگ اِنت، بالاچ مدام گوں وتی ھمراھاں ھوار جھد ءَ اِنت، بالاچ شھیدی ءَ پد ھم وتی کرد ءَ پیلو کنگ ءَ اِنت۔ ساراوان داں جھلاوان ءَ بہ گر سرجمیں بلوچستان ءَ بالاچ گوں وتی راج ءَ ھوار اِنت۔
بالاچ ءِ ھون الّم رنگ کار اَنت۔ بلوچستان ءِ سرزمین اے گواھی ءَ دنت کہ بالاچاں کدی گوں وتی زمین ءَ دْروہ نہ کرتگ ءُ چہ مرگ ءِ ترس ءَ پشت ءَ نہ کنز اِتگ اَنت۔ بالاچ مری ءَ ھوار شھید اسد بالاچ، شھید ھدایت اللہ بالاچ، شھید نوربکش بالاچ، شھید وھید بالاچ، شھید پدائی انیل بالاچ ءُ شھید ممتاز بالاچ ءَ ھوار بازیں بالاچ اَنت کہ پہ دژمن ءَ تباھی جوڑ بوتگ اَنت۔
پاکستانی لشکر ءِ ادارہ سی ٹی ڈی کہ بالاچ ء مولابکش ئِے چہ گس ءَ واب ءَ پاد کرت ءُ بیگواہ کرت، ءُ رند ءَ دروگیں میڑے ءَ شھید کرت۔ چہ ریاست ءِ اے کرد ءَ زانگ بیت کہ پاکستان ءَ چہ بلوچ ءِ جنگ ءَ چینکس پروش وارتگ۔ بالاچ ءِ شھیدی ءَ بلوچ راج ءِ جنگ نوکیں دْروشمے دات۔ چہ بالاچ ءِ شھیدی ءَ کلیں بلوچستان ءَ نوکیں جھدے بنا بوت۔
شھید اِستاد اسلم وتی تامرے ءِ تہ ءَ گْوش ایت کہ ’’ بلوچ ءِ جنگ چہ مئے دست ءَ گیش پاکستانی ریاست ءِ دست ءَ اِنت کہ ریاست جنگ ءَ کجام نیمگ ءَ برگ لوٹ ایت۔ ‘‘ مروچی پاکستان اے جنگ ءَ ٹکی ھساب ءَ دین ءِ ھساب ءَ تالان کنگ ءَ اِنت بلے دژمن ءِ اے پندل ھم بے سوب بوتگ ءُ ریاست ءَ ایوک ءَ بلوچ کنگ ءُ شھید کنگ ءَ بندات کرتگ۔
بلوچ ءِ جنگ چہ مئے دست ءَ گیش پاکستانی ریاست ءِ دست ءَ اِنت کہ ریاست جنگ ءَ کجام نیمگ ءَ برگ لوٹ ایت۔
شھید استاد اسلم
بالاچ ء مولابکش بلکیں بلوچ جھد ءَ ھوار نہ بوتگ ناں کہ آئی ءَ سلاہ زرتگ ءُ جنگ کرتگ آ تھنا گیرت مندیں بلوچے بوتگ ءُ وتی راج ءِ دلاری نہ کرتگ ئِے۔ بلے ھمے بالاچ کہ چہ جھد ءَ گستا بوتگ ءُ تھنا وتی کاراں دلگوش بوتگ ھمے بالاچ ءَ مرگ ءَ رند گْوستانک ءَ نوکیں نامے ودی کرتگ۔
