بلوچ وومن پورم ءِ بنجاھی جارکش ءَ وتی شنگ کرتگیں درشانے ءَ گوشتگ کہ پہ بلوچستان ءِ جاہ منندیں مردماں آیانی سرڈگار ریاست ءُ ریاست ءِ برجاہ داروکیں ادارھاں جھندم جوڑ کرتگ۔ انوگیں روچاں چنچو زوریں بیگواھی ءِ کیس دیم ءَ آتکگ اَنت۔ آیانی تہ ءَ گیشتریں کچ بلوچ نودربرانی اِنت۔ بلوچستان ءَ چنچو سال اِنت کہ زوریں بیگواھی ءِ درچ برجاہ اِنت ءُ بند بوگ ءِ نام ءَ نہ زانت۔ زوریں بیگواھی کانود ءِ ھساب ءَ میارے لیکک بوگ ءَ اِنت بلے ریاست لگورے ایشی روچ پہ روچ گیش کنگ ءَ اِنت۔ ریاست پہ وتی یک میارے ءِ چیر دیگ ءَ میارباری کنگ ءَ اِنت۔ آ زوریں بیگواھی بہ بیت، کودک ءُ بے میاریں مردمانی کوش ءُ یا دروگیں میڑ ءِ دروشم ءَ بہ بیت۔
آئی ءَ دیمتر ءَ گوشتگ کہ انوگیں بلوچ نودربرانی زوریں بیگواھی ءُ پنجگور ءَ بیست روچ پش بیگواہ کنگ بوتگیں دوئیں برات آبد ءُ سابر ءِ زوریں بیگواھی ءَ بلوچستان ءَ یک ترسے چاگردے ودی کرتگ۔ ما سرپد بہ ایں کہ زوریں بیگواھی مچی سزایے چہ ایشی تچکی ءَ زور بیگواھیں مردمانی کھول سانمند بوگ ءَ اَنت۔ بلوچ مات ءُ گھار ھمک روچ دگ ءُ چاراھانی سر ءَ زھرشانی کنگ ءَ گندگ بنت۔ آیانی ھمک روچیگیں زندمان ءُ جاندارھی ءِ سر ءَ مزنیں سانے کپ ایت۔ چہ ایشی سسائی نادراھیانی آماچ بنت۔ ما تچکی ءَ گوش ایں کہ بلوچ مات ءُ گھار بے کس نہ اَنت آ گوں جتائیں ھیلہ ءُ پندلاں ترس آماچ کنگ بنت ءُ تیوک ءَ یل کنگ بنت، ما وتی راھبند ءِ رد ءَ شریں وڑے ءَ آیانی جھگیری ءَ کن ایں ءُ آیانی چیرترتگیں توار ءَ داں جھان ءِ دیم ءَ کار ایں۔
آئی ءَ گڈی ءَ گوشتگ کہ ما پنجگور ءَ گوستگیں چہ بیست روچاں نشتگیں دو برات بیگواھیں سابر ءُ آبد ءِ کھول ءِ زھرشانی ءِ شریں وڑے ءَ پلہ مرزی ءَ کن ایں ءُ ھر پیمیں جھد ءَ گوں آیاں اوشت ایں ءُ چہ ریاست ءَ لوٹ کن ایں کہ آ وتی ردیاں بہ زانت ءُ درسیں زور بیگواھیں مردماں آجو بہ کن کہ انوگیں روچاں بیگواہ کنگ بوتگیں نودربر ءُ پنجگور ءَ زھرشانی ءَ نشتگیں کھول کہ آیانی آزیز گوستگیں بیست روچ بیگواہ اَنت۔
