بلوچ وومن پورم ءِ سروک ڈاکٹر شلی بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ اے بنکی انسانی ھکانی تچک ءَ بگیری اِنت کہ سے بلوچ شھیدانی پرس ءَ کھول چہ وتی آزیزانی لاشانی گلزمین ءِ میار کنگ ءَ زبھر کنگ بیتگ اَنت۔ یک بژنی گپے ءُ ایشی ءَ ایر جن آں، اے زوراکی ءُ نادزرسی ءَ پیش دار ایت کہ تربت ءِ ترندیں گرم ءِ سر ءَ سے روچ ءِ زھرشانی کنگ ءَ ابید دمگی واکدار ءُ لشکری کارمنداں لاش نہ داتگ اَنت۔ چہ ایشی ءَ ابید کھول ساڑی نہ بیتگ اَنت کہ آ کل کنگ بیتگ اَنت۔ اے گامگیج نہ تیوک ءَ انسانی ھکانی بگیری اِنت بلکیں اسلامی دودانی ھم بگیری اِنت کہ آ گوں لاشاں شرپ ءَ پیش بوگ ءُ ارزشت دیگ ءِ سر ءَ زور دنت۔
آئی ءَ گوشتگ کہ کھولاں نہ تیوک ءَ گڈی دودمان ءِ پیلو کنگ ءِ موہ دیگ بیتگ اَنت بلکیں وتی آزیزانی اسلامی درگت ءَ گلزمین ءِ میار کنگ ءَ دارگ بیتگ اَنت۔ لاش بے کپن ءَ کل کنگ بیتگ اَنت ءُ کھولاں جنازہ ءِ نماز وانگ ءِ موکل دیگ نہ بیتگ اَنت۔ اے یک بنکی اسلامی دودمانے کہ گمجتیں کھولاں کرار بکش ایت۔
ڈاکٹر شلی بلوچ ءَ گوشتگ کہ چارمی روچ ءَ کھولاں پہ وتی آزیزانی نام ءَ یک چیدگی کبر ءِ جوڑ کنگ ءِ پیسلہ کرتگ۔ پد ءَ ھم کھول ھمے جاہ ءَ آتکگ اَنت گڑا دمگی پولیس انتزامیہ ءَ دزمانجنی کرتگ۔ گوں ترندیں رویشتاں پیش بوگ اسلامی شرپ ءُ پہ انسانی ھکانی برجاہ دارگ ءَ انتزامیہ ءِ سر ءَ جست ودی بیت۔
آئی ءَ گوشتگ کہ جیڑہ ءِ سر ءَ اسلامی ملایانی بے تواری کھتیگ کنت، آ پہ کھولاں زمہ واری ءُ انساپ ءِ لوٹ ءَ توار چست کنگ ءَ نہ اَنت۔ آ سرکاری گامگیج ءَ در اسلامی ءُ درکانودی نہ لیک اَنت ءُ ایشی ءَ پرچا ایر نہ جن اَنت۔ کرآن مجید ءَ گوں لاشاں شرپ ءَ پیش بوگ ءِ ارزشت ءِ سر ءَ زور دیگ بیتگ۔ اسلامی ملایاں اے ناھکیانی بگیری ءَ توار چست کنگ لوٹ ایت ءُ چہ سرکار ءَ پہ کھولانی بنیادی ھکاں لوٹ کنگ لوٹ ایت۔
داکٹر شلی بلوچ ءَ گوشتگ کہ وھد ھمیش اِنت اسلامی ملایاں وتی بے تواری پروشگ لوٹ ایت ءُ کھولاں کمک بہ کن اَنت۔
