اسلام آباد ءَ بلوچ یکجھتی کمیٹی ءِ سروک ڈاکٹر مھرنگ ءَ ماں چاگردی رسانکدر ایکس ءَ منزور پشتین ءِ دزگیر کنگ ءِ تامربند ءِ سر ءَ نبشتگ کہ پی ٹی ایم ءِ سروک منزور پشتین یل کنگ ءَ پد پد ءَ بندیگجاہ ءِ دیم ءَ آوار جنگ بیتگ کہ اے زوراکی ءِ گُڈی سیمسر اِنت۔ ھما مردم ھمے گوش اَنت کہ شما چہ آمیدگس ءَ پرچہ بے اوست اِت پہ آیاں من ھمے گوش آں کہ وھدے آمیدگس مردمانی انساپ دیگ ءَ بے سوب بہ بیت گڑا چہ آ آمیدگس ءَ بے اوستی ھزار درسد گھتر اِنت۔
آئی ءَ گوشتگ کہ منزور پشتین ءِ یل کنگ ءِ پرمان آمیدگس ءِ نیمگ ءَ دیگ بوتگ، بلے آمیدگس ءِ پرمان لگتمال کنگ ءُ پد ءَ دزگیر کنگ ءُ ایشی سر ءَ آمیدگس ءِ بے تواری وت راھبند ءُ کانود ءِ گون ءَ توازھے۔
یات بہ بہ اِت کہ پشتون تھپز موومنٹ ( پی ٹی ایم ) ءِ سروک منزور پشتین چہ اڈیالہ بندیگجاہ راولپنڈی ءَ یل کنگ ءِ کاگدی کاروائی سرجم بوگ ءَ پد پد ءَ دزگیر کنگ بوتگ۔
رسانکدر ءَ شنگ بوتگیں تامربند ءَ ھمے گندگ بیت کہ منزور پشتین ءَ لشکر ءَ پد ءَ دزگیر کرتگ ءُ برگ ءَ اَنت۔
