بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں بیست ءُ شش نومبر ءَ سے شمبے ءِ یک ءَ کیچ ءِ ھند بلیدہ زیردان ءَ زورگریں پاکستانی لشکر ءِ گشتی ٹولی ءِ پھازداریں کارمندانی سر ءَ اُرش کرتگ ءُ اُرش ءَ دو کارمند سک ٹپی بوتگ۔
آئی ءَ گوشتگ کہ اُرش ءَ پد پروش وارتگیں لشکر ءَ چو مدامی ءَ دگ بستگ ءُ پٹ ءُ پول ءِ نام ءَ مردم دلسیاہ کرتگ اَنت۔
جارکش ءَ گوشتگ کہ بلیدہ ءُ کِر ءُ کشاں کشندہ ٹولی، منشیات ءِ باپاری ءُ کاروباری مردم زورگر ءِ کمکاری جوڑ بیتگ ءُ راج دژمنی کنگ ءَ اَنت۔ ما باز بر ءَ وتی درشانانی تہ ءَ مردم کڈن کرتگ اَنت کہ آ زورگریں لشکر ءِ کمکار جوڑ مہ بنت ءُ راج ءِ دژمنی ءَ مہ کن اَنت اگاں نہ گڑا ایشی ءِ آسر شر نہ بیت۔
آئی ءَ گوشتگ کہ ما لشکر ءِ کمک کنوکیں مردمانی کھولاں گْوشگ لوٹ ایں کہ وتی مردماں چہ راج دژمنی کاراں مکن بہ کن اَنت،سرمچار ھمک ھما مردم ءِ نشانگ کنگ ءَ چاڑی اَنت کہ زورگریں لشکر ءِ کمکار اَنت ءُ وتی مردماں زور ءُ زوراکی ءِ نشانگ کنگ ءُ چکچینی ءَ زورگر ءِ ھمراہ اَنت۔
جارکش ءَ گوشتگ کہ بلوچ راج ءَ پہ راجی آجوئی ءَ زوریں بیگواھی ءُ شھیدی ءَ بگر داں لڈ ءُ بار کنگ ءَ ، ھزارانی کچ ءَ پسگاں دیمونی داتگ۔اے دیمونیاں پہ یک ریاستی چریک ءُ راج دژمنے ءَ زوال بوگ ءَ نیل ایں۔
میجر گھرام ءَ ارش ءِ زمہ واری منّ اتگ ءُ گوشتگ کہ راج سدک بہ بیت کہ زورگریں لشکر سسائی ءُ کِردی پروش ءِ آماچ اِنت زوت یا دیر زورگر ءَ چہ وتی سرڈگار ءِ دراھگ ءُ روگ ءَ لاچار کن ایں ءُ شھیدانی لوٹ ءُ واھگاں سرجم کن ایں۔
