بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں زی کلات ءِ ھند ھربوئی ءَ زورگریں پاکستانی لشکر دو جتائیں بمب ارشاں نشانگ کرتگ، چہ ایشی دژمن ءِ دہ کارمند مرتگ ءُ شش ٹپی بوتگ۔
آئی ءَ گوشتگ کہ بی ایل اے ءِ سرمچاراں دوشمبے ءِ روچ ءَ کلات ءِ ھند ھربوئی ءَ زورگریں پاکستانی لشکر ءِ کارمند ھما وھد ءَ نشانگ کرتگ اَنت کہ آ ھمے ھند ءَ پہ لشکرکشی ءَ روگ ءَ بیتگیں کاروان ءِ پھازداری ءَ پانگس ءَ مچ بوتگ اَنت۔
جارکش ءَ گوشتگ کہ سرمچاراں دژمنیں لشکر ءِ ھالیگیں پانگسے ءَ تراکناکیں شورہ چیر کرتگ، وھدے کہ دژمنیں لشکر ءِ چاردہ کارمند ھمے پانگس ءَ مچ بوتگ گڑا ھمے وھد ءَ شورہ تراکینتگ اَنت کہ چہ تراک ءِ سْوب ءَ کم چہ کم نوہ کارمند جاھی مرتگ ءُ چار ٹپی بوتگ۔
آئی ءَ گوشتگ کہ دژمنیں کارمندانی لاش زی سرجمیں روچ ءَ ھما جاہ ءَ ایر بوتگ اَنت۔ بیگاہ ءَ دژمنیں لشکر ءِ گاڑی ھمے جاہ ءَ سر بوتگ اَنت گڑا سرمچاراں گوں دگہ بمب اُرشے ءَ دژمنیں لشکر نشانگ کرتگ۔ تراک ءَ دگہ یک کارمندے جاھی مرتگ ءُ دو ٹپی بوتگ ءُ گاڑی ءَ باز تاوان بوتگ۔
جیھند ءَ اُرش ءِ زمہ واری منّ اتگ ءُ گوشتگ کہ داں زورگریں لشکر چہ بلوچستان ءَ در نئیت مئے اُرش برجاہ بنت۔
