شال: نوشکے ءِ جاہ منند نسیب اللہ ءِ زوریں بیگواھی ءِ دہ سال سرجم بوگ ءَ مرچی شال پریس کلب ءِ دیم ءَ زھرشانی کنگ بوتگ۔ زھرشانی ءَکھول، نودربر، سیاسی ءُ چاگردی کارکن ءُ جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشا نی کنوکیں مردماں پلے کارڈءُ بینر دستاں بوتگ اَنت ءُ آیانی زوریں بیگواھیانی بگیری ءَ اوگام جتگ ءُ درسیں بیگواھیں مردمانی آجوئی ءِ لوٹ کرتگ۔
زھرشانیءَ زور بیگواھیں نسیب اللہ بادینی ءِ کھولءَ تران کرتگءُ گوشتگ کہ نسیب اللہ 25 نومبر 2014 ءَ چہ چاگے اڈہ نوشکے ءَ لشکری کارمنداں مردمانی دیم ءَ آوار جتگ ءُ بیگواہ کرتگ۔ اے وھد ءَ آ دوازدہ تبک ءِ نودربرے بوتگ آئی دلگوش گوں وتی وانگ ءَ بوتگ۔
ماہ پارہ ءَ تران کرتگ ءُ گوشتگ کہ نسیب اللہ ءَ تیوک ءَ بلوچ بوگ ءِ سزا دیگ ءَ اَنت۔ آئی ءَ دگہ ھچ وڑیں میار نیست۔ نسیب اللہ ءِ زوریں بیگواھی ءِ بگیری ءَ ما کانود ءِ درسیں وڑءُ پیم کار گپتگ اَنت۔ بلے آمیدگسءُ آدگہ ادارہ نادرس اَنت۔
آئی ءَ گوشتگ کہ ما ھمک وھد ءَ ھمے لوٹ کرتگ کہ اگاں نسیب اللہ ءِ سر ءَ چونیں بھتامے ھست گڑا آمیدگس ءَ پیش کنگ بہ بیت، بلے چہ دہ سال ء ِ گوزگ ءَ پد ھم آئی ھچ وڑیں ھال نیست۔
