بلوچ راجی زرمبشت ( بی این ایم ) ءِ بنجاھی کارگشاد دل مراد ءَ ماں چاگردی رسانکدر ایکس ءَ گوادر ءَ بلوچ راجی مچی ءَ دزگیر بوتگیں ارشکارانی تامربند ءِ سر ءَ نبشتگ کہ بلوچستان ءَ پاکستان ءِ وتگڑیں واکدار ءُ وتگڑیں مزن وزیر سرپراز بگٹی ءَ جار جتگ اَت کہ گوادر ءَ بی ایل اے ارش کنت۔ ھمے بنیاد ءَ گوادر ءِ مچی ءِ سر ءَ پاکستان ءِ ارش پیشگوھی ءِ ھال اَت۔ مول ھمے بوتگ کہ لشکر وتی کارمندانی پارست ءَ ارش کنت بھتام ءَ بلوچ سلاہ بندیں گلے ءِ سر ءَ جنتءُ وت ءَ بے میار کنت۔
آئی ءَ گوشتگ کہ بلے پاکستان ءِ بد بھتی ءَ لشکر ءِ سلاہ بندیں کارمند گوں رنگیں دستاں درسیں جنگی ساز ءُ ساماناں دزگیر کنگ بوت ءُ آ تچکی ءَ منگ ءَ اِنت کہ آئی ءَ ملٹری انٹیلیجنس ءَایم آئی ءَ پہ بی وائی سی ءِ سروکانی کشگ ءَ دیم داتگ۔ اگاں بلوچ ایمن، دودمان ءُ چہ مردمی ھکاں سریچ مہ بوت اَنت گڑا اے کارمند ءَ پنجاپ ءِ چونیں ھم مچی یے ءِ وڑ ءَ زندگ ءَ مانداشتگ اَت۔ بلے چہ ایشی ابید بلوچ چہ باسمائی ءِ جوزگ ءُ اشک ءِ جوزگ ءَ اے وڑ بوگ ءَ نہ اشتگ ءُ بس یک کشندھے، یک چریکے ءَ کشگ ءَ ابید کشندہ ءِ تچکیں شوربندی ٹھینوکیں پاکستانی لشکر ءِ دروشم جھان ءِ دیم ءَ پیش کرتگ۔
دل مراد ءَ گوشتگ کہ پاکستانی لشکر ءَ اے وھد ءَ سرجمیں بلوچستان تیوک ءَ گوادر کوشجاھے جوڑ کرتگ۔ لشکر کودکیں زھرشانی کنوکانی سر ءَ تیرگواری کنگ ءُ گوادر ءَ روکیں ھمک کسان ءُ مزنیں گاڑیاں تباہ کنگ ءَ اِنت۔ چنچو کودکیں بلوچ جنگ بوتگ ءُ چنچو ٹپی اِنت۔ آیانی باروا ھچ وڑیں سرپدی نیست ۔ پمیشکا درسیں رسانکدری بنشوں بند کنگ بوتگ اَنت۔
