آواران: زورگریں پاکستانی لشکر ءِ جوڑ کرتگیں چیریں ادارھانی کارمنداں زھری ھان نامیں مردمے ءِ گس ءَ بیڑ برتگ ءُ زوراکی کرتگ۔
اھوالکار ءِ رد ءَ چار روچ پیش کشندہ ٹولی ءِ کارمنداں مشکے ءِ میتگ نوکجو شیرگی ءَ زھری ھان ء جما ھان ءِ گس ءَ بیڑ برتگ ءُ جنین ءُ زھگاں ھوار درسیں مردم لٹ شاپ کرتگ اَنت۔ شائستہ ء اللہ بکش، ھان بی بی ء مندو، سمیہ ء رشید، امداد ء زھری ھان، شھباز ء اللہ بکش، بلوچ ھان ء گل مھمد، لکو ء گل مھمد، رابیہ ء زھری ھان ءُ پزل ء زھری ھان لٹ دیگ بوتگ اَنت۔
بنشون ءِ رد ءَ گوں مردماں زوراکی کنوکیں کشندہ ٹولی ءِ کارمند سردار الی ھیدر ءِ چیردستی ءَ کارکنوکیں ھدا داد ءُ آئی ھمبل بوتگ اَنت۔
