![](https://zrumbesh.com/wp-content/uploads/2024/05/WhatsApp-Image-2024-05-17-at-03.33.35_1de2e887-1024x576.jpg)
شال : پہ زور بیگواھیں مردمانی پد جنگ ءَ شدکشیں زھرشانی گدان ءَ 5449 روچ سرجم بوتگ۔ آدینگ ءِ روچءَ جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ سرکماش ماما کدیر گوں مردماں تران کرتگ ءُ گوشتگ کہ بلوچ راج نوں شیوار اِنت، زھگ زھگ ایردستی ءِ باروا سرپد اِنت۔ ہرکسءَ چہ واب ءَ سما کرتگ ءُ زوریں بیگواھی ءِ بگیری ءَ اوگام جنگ ءَ اِنت ءُ ایمنیں جھدءِ راہ ءَ وتی ھوناں ریچگ ءَ اِنت دیم ءَ ھم ھوناں ریچ اَنت۔ اے رتکگیں ھون زوال نہ بنت ءُ شھیدانی ھون جھد ءَ مھکم کن اَنت۔
آئی ءَ گوشتگ کہ اے جھد ءِ میان ءَ ھزارانی کچ ءَ بلوچ پسگاں پہ وتی آزیزانی آجوئی ءَ ھون رتکگ اَنت۔ اے جھان ءِ تہ ءَ اے وڑیں باز کم مردم بنت کہ پہ مردمگری ءَ جھد بہ کن اَنت ءُ پہ نزوریں راجاں توار چست کن اَنت ءُ اے گرانیں راہ ءَ وتی جان ءِ دیمونیءَ بدے اَنت۔
ماما کدیر گوشتگ کہ بلوچ ورنایانی تہ ءَ ڈاکٹر، انجینئر، کانود زانت ءُ زندمان ءِ جتائیں بھرگاں سیادی داروکیں مردم اے جھد ءَ ھوار اَنت۔ مئے دژمن ءَ بلوچ ورنادیستگ اَنت ءُ ترس آماچ اِنتءُ آیانی لیکہ ءَ ریاست ھیران کرتگ۔ ریاستی لشکر ھمک روچ بلوچستان ءَ لشکرکشی ءَ تیز کنگ ءَ اِنت ءُ اے میان ءَ بلوچستان ءِ جتائیں ھند ءُ دمگاں لشکرکشی برجاہ اِنت۔ لشکرکشیاں چنچو جنین ءُ زھگ شھید ءُ ٹپی بوتگ اَنت ءُ ھزارانی کچ ءَ مردم زور بیگواہ اَنت۔