گْوادر: بلوچ یکجھتی کمیٹی ءِ سروک سبگت اللہ شاہ جی ءَ گْوادر پریس کلب ءَ پریس کانپریس کرتگ ءُ گوں اھوالکاراں دلگوش گور کرتگ ءُ گوشتگ کہ شما درس سرپد اِت یکبرے پد ءَ گْوادر ءِ ٹٹ کنگ ءِ شوربندی بندات کنگ بوتگ، انچوش کہ گْوادر ءِ چار ھند اَنت، سے ھند جیمڑی، پسنی ءُ ھورماڑہ سرجم ءَ چہ شھر ءَ ڈن اَنت ءُ گْوادر ھند ءِ سے ھنکین اَنت چھب کلمتی، پلیری ءُ سربندن ھم چہ شھر ءَ ڈن بنت۔ گْوادر ءِ ٹٹ ءِ تہ ءَ بند کنگ کالونائزیشن ءِ گنتریں دروشم اِنت۔ ما اے نوک آبادکاری ءِ بگیری ءَ زرمبشتے برجم دار ایں۔
آئی ءَ گوشتگ کہ اے وھد ءَ ما دمگ ءِ سرھالاں نبشتگیں چہ سرڈگار گْوادر ءَ گوں شما دلگوش ایں، انچوش کہ شما سرپد اِنت پاکستان ریاست گْوادر شھر ءَ چاریں نیمگاں ٹٹ کنگ ءُ جھان ءِ مستریں زندان جوڑ کنگ ءَ اِنت۔ گْوادر گوں وتی زیبائیاں زوت شوربندی ءِ رد ءَ زندان جوڑ بیت۔ یک انچیں زندانے کہ ایشی تہ ءَ سرجمیں کھول پہ مدامی بندیگ بنت ءُ وتی کڈکانی تہ ءَ نندک اَنت ءُ ھمے مار اَنت کہ آیانی گس تیوک ءَ ھمیش اِنت۔ اگاں کسے چہ گْوادر ءَ ڈن بروت گڑا واتری ءَ وتی گس ءَ آھگ ءَ ٹٹ ءِ دروازگانی دپ ءَ پہ وتی پجار کناھینگ ءَ داں اداراں بہ اوشت ایت ءُ جنجالانی دیمپان بہ بیت۔ آیانی میار تیوک ءَ ھمے بیت کہ آ گْوادر ءِ جاہ منند اَنت ءُ نزوریں بلوچ اَنت۔ انچوش کہ شال ءِ کینٹ اِنت دروازگاں پترگ ءَ وتی پجار کارڈ ءَ دوازگ ءَ ایر کن ئے واتری کائے گوش ایت کہ انوں وھد شتگ باندا بیا چہ پلاں دروازگ ءَ وتی پجار کارڈ ءَ بزور۔ بلے نوں گْوادر ءِ جاہ منند ھمک روچ پہ وتی گساں سر بوگ ءَ جنجالانی دیمپان بہ بنت۔
آئی ءَ گوشتگ کہ مئے جاور شمئے دیم ءَ اَنت پہ درآمدانی پھازداری ءَ گْوادر پیسر ءَ دو ٹکرانی تہ ءَ بھر کنگ بوتگ، بالی پٹ ءَ بگر داں گْوادر پورٹ ءَ پہ درآمدیں مردماں آسراتیانی بنجاہ جوڑ کنگ بوتگ، نوں ھمے نوبت آتکگ کہ پہ پھازداری ءِ نام ءَ گْوادر شھر ءَ ٹٹ ءِ تہ ءَ بند کنگ ءَ اَنت۔ اے کجام کانود اِنت کہ پہ وتی پھازداری ءَ مئے گساں زندان جوڑ بہ کن؟ اربانی کچ ءَ زر وروکیں لشکری نوں گساں ٹٹ ءِ تہ ءَ بند کنگ ءَ اِنت چونیں پھازداری یے؟ ما اے وڑیں کارپداں کالونائزیشن ءِ گنتریں دروشم لیک ایں، لکانی کچ ءَ آبادی ءِ شھر پہ لھتیں درآمدیں مردمانی پھازداری ءَ زندانے جوڑ بوگ ءَ اِنت ایردستی ءِ گنتریں دروشم اِنت۔ اے کار ءِ بگیری ءَ ھمک بلوچ ءَ اوشتگ لوٹ ایت۔
آئی ءَ گوشتگ کہ گوادر ءَ ھوار گوں سرجمیں بلوچ راج ءَ لوٹ کن ایں کہ اے کار ءِ بگیری ءَ گیرتمندیں بلوچ ءِ بستار ءَ بلوچ یکجھتی کمیٹی ءِ اے گھگیری ءِ بھر بہ بنت۔ نبشتہ کار بہ نویس اَنت، اکس کش وتی اکسانی پارست ءَ زھرشانی بہ کن اَنت، تامرساچ آیانی بگیری ءَ تامر جوڑ بہ کن اَنت ءُ راج ءِ ھمک پسگ اے ناھکیں میارباری ءِ بگیری ءَ بلوچ یکجھتی کمیٹی ءِ ھمراھداری ءَ توار چست بہ کن اَنت۔
آئی ءَ گوشتگ کہ 12 مئی 2024 ءَ یک شمبے ءِ روچ ءَ StopFencingGwadar ءِ بنگپ ءَ زھرشانی روانکے ءِ جار ءَ جن ایں، ما گوں سرجمیں مکُران ءِ درسیں شرپمندیں بلوچانی گون ءَ لوٹ کن آں کہ آ اے روانک ءَ سوبین بہ کن اَنت ءُ اے زرمبشت ءَ داں ھما وھد ءَ دیم ءَ بہ بر اَنت دانکہ گْوادر ءِ ٹٹ کنگ ءِ شوربندی سرجم ءَ ھلاس کنگ نہ بوتگ۔ روانک بیگاہ ءِ چار ءَ چہ جاوید کمپلیکس ءَ داں جیمڑی ءِ شھید چاراہ ءَ روت۔
