بلوچ اسٹوڈنٹس ایکشن کمیٹی ھاران ھنکین ءِ آرگنائزنگ باڈی دیوان بنجاھی سرکماش شبیرءِ سروکی ءَ برجم دارگ بوتگ۔ دیوان ءِ گچینی مھمان بنجاھی ھالرسانی کارگشاد اُزیر بوتگ۔ دیوان ءِ بن گپ پجاری دیوان، بنجاھی سرکیولر، گلَ کار ءُ آؤکیں گامگیج بوتگ اَنت۔
دیوان ءِ اولی بن گپ پجاری بھر بوتگ کہ کُلیں سنگتاں وتی پجار کرتگ ءُ دومی بن گپ بنجاھی سرکیولر ءِ تہ ءَ بنجاھی سنگتاں سرکیولر ونت کہ آئی ءِ تہ ءَ بنجاھی پتر ءِ دیوان ءِ اھوال ءُ پہ آوکیں کارانی بارو ءَ سوڑھ ھوار بوتگ اَنت۔
دیوان ءِ دیم ءِ بنگپ گَل کار بوتگ کہ آئی ءِ تہ ءَ بنجاھی سنگتاں تران کنان ءَ گوْشتگ کہ ھاران یک مزنیں سیاسی گراونڈے ءُ اد ءِ ورنا چہ بلوچ راجی سیاست ءَ باسما اَنت ءُ راجی زمہ واریاں سرپد ءُ پوھ اَنت۔ ھاران ءِ نودربر سیاست بلاھیں مدتےءَ یلہ بوتگ ءُ اد ءِ ورنا چہ جوانیں سیاسی راھبندے ءَ زبھر بوتگ اَنت بلے گل ءِ سنگتانی جھد ءِ برورد ءَ مرچی ادارہ یک جوانیں سیاسی چاگردے ودی کنگ ءَ سوبین بوتگ ءُ نی ھمے چاگرد گیش گھتر ءُ مھکم کنگی اِنت داں ورنایاں دلجمیں سیاسی تلو ءُ چاگردے بہ رس ایت ءُ گوں بلوچ نودربر سیاست ءَ ھمگرنچ بہ بنت۔ بگندے ادارہ ءَ کمو پیسر ءَ آھگی بوتگ بلے ھمنچو وھد کہ لگیتگ اے وھد ھمے سیاسی چاگرد ءُ گَل کاری ءِ سرءَ درکار بوتگ اَنت داں ادارہ مھکمیں رنگے ءَ اوشتات بہ کنت۔
سنگتاں دیمتر ءَ تران کنان ءَ گوْشتگ کہ ھاران ءِ تہ ءَ راجدوستی ءِ مھکم بیگ ءِ مستریں دروراں چہ یکے اِش اِنت کہ اد ءَ نودربر سیاست نہ بوتگ بلے ورنا ءُ مردمانی تہ ءَ راجی سِنچ ءُ پِگر زندگ بوتگ ءُ مستریں وشی ءِ گپ اِش بیت کہ مردم پہ سیاسی جُھد ءَ ھُدوناک بوتگ اَنت۔ دومی ھاران ءِ بارو ءَ وتگڑیں لھتے ھیال بوتگ کہ اد ءَ دین پرستی ھست بلے گواچنی گپ اِش اِنت کہ ھاران ءِ چاگرد بلوچستان ءِ ایدگہ میتگانی ڈول ءَ یک سیکولر چاگردے کہ اد ءَ مھلوک دین ءِ پرک ءُ پیر ءَ بُرز بلوچ ءِ بستار ءَ زندگ اِنت کہ اشانی تہ ءَ ھندو کمیونٹی ءِ مردمانی گوں چاگرد ءَ برابری ءِ بستار ءَ زند گوازینگ ءُ وت ءَ بلوچ سرپد بیگ مستریں درور اَنت۔ اد ءِ ورنایانی تہ ءَ ھم سیکولر ءُ بلوچ دوستیں پگرے ھست کہ ورنا گوں جتائیں کسانیں کمیونٹیاں ھوار یکجاہ راجی بستار ءَ چاگرد ءِ بھر اَنت بلے ھمے پِگر گیشتر سِنگارگ ءُ مھکم کنگ لوٹ ایت۔ ادارہ ءِ تہ ءَ ہندو کمیونٹی ءِ سنگت ھم ھوار اَنت ءُ سیاسی جُھد ءِ بھر اَنت کہ وتی تہ ءَ وت سیاسی ءُ پگری امل ءِ سوبمندی اِنت۔ اے بلوچ راجدوستی ءِ مھکمی اِنت کہ بلوچ وت ءَ سرجم راجے سرپد بیت۔
گڈسرءَ سنگتاں تران کنان ءَ گوْشتگ کہ ھاران ءِ گراونڈ کمو چہ بلوچ راجی سیاست ءَ گستا کنگ بوتگ کہ آئی ءِ مستریں سوْب مئے ھیال ءَ بلوچ نودربر سیاست ءِ نہ بیگ بوتگ، بلے نی ادارہ ءَ وتی اسٹرکچر جوڈ کتگ ءُ ھمے جھد بیت کہ اد ءِ نودربر سیاست مھکم کنگ بہ بیت ءُ ورنا راجدوستی ءِ لیکہ ءِ بنیات ءَ ایدگہ بلوچ ورنایاں گوں نزیک کنگ ءُ ھوار کنگ بہ بنت داں بلوچ وتی راجی بستار ءَ ھکیگیں رنگے ءَ دیست بہ کنت ءُ پہ راج ءَ جھد بہ کنت۔
دیوان ءِ تہ ءَ سرجمیں بنگپانی سر ءَ تران کنان ءَ پد گُڈی بن گپ آؤکیں گامگیج بوتگ کہ آئی ءِ تہ ءَ نوکیں ھنکین جوڈ کنگ بوتگ ءُ پہ ھنکین ءَ جتائیں سوڑگ زورگ بوتگ اَنت۔ ھاران ءِ نوک جوڈ بوتگیں ھنکین ءِ آرگنائزنگ باڑی ءِ تہ ءَ ادنان آرگنائزر، ندیم ڈپٹی آرگنائزر، زیبا، امُل ءُ اِشراک آرگنائزنگ کمیٹی ءِ باسک گچین کنگ بوتگ اَنت۔
دیوان ءِ گُڈسر ءَ گچین بوتگیں کابینہ ءُ ھنکینءِ باسک سوگند دیگ بوتگ اَنت کہ سنگتاں وتی زمہ واریاں مھکمیں رنگے ءَ پیلو کنگ ءِ پیمان کرتگ ءُ دیوان ھلاس کنگ بوتگ۔
