شال ءَ پہ زور بیگواھیں مردمانی آجوئیءَ وائس پار بلوچ مسنگ پرسنز( وی بی ایم پی ) ءِ زھرشانی گدانءَ شال پریس کلب ءِ دیم ءَ 6109 روچ سرجم بوتگ۔
وی بی ایم پی ءِ چیئرمیں نسر اللہ بلوچءَ وتی درشان ءَ گوشتگ کہ پہ زوربیگواھیں مردمانی آجوئی ءَ آئید ءِ روچ ءَ شال پریس کلبءِدیم ءَ زھرشانی کنگ بیت۔
آئی ءَ گوشتگ کہ آئید ءِ روچ ءَ زھرشانی کنگ ءِ مول ھمیش اِنت کہ بیگواھیں مردمانی رنجاں جھانءِدیم ءَ پیش بہ کن ایں، دانکہ ڈیھ ءِ ادارھانی سروک بہ زان اَنت کہ زور بیگواھیں مردمانی کھول چہ وتی آزیزانی جتائی ءَ گوں کجام درداں زند گوازینگ ءَ اَنت۔
نسر اللہ بلوچ ءَ گوشتگ کہ ما ھمے لوٹ ایں ایشی زمہ وار اے مزنیں جیڑہ ءَ گوں سنگینی ءَ بہ زور اَنت ءُ گوں زور بیگواھیں مردمانی کھولاں ڈیھ ءِ آئین ءُ کانود ءِ رد رد ءَ پیش بہ بنت، زوریں بیگواھی ءِ جیڑہ ءِ ھلاسی ءَ گامگیج بزور اَنت۔
آئیءَ گوں درسیں بھرگاں سیادی داروکیں مردماں لوٹ کرتگ کہ آزھرشانیءَ بھر بزور اَنت ءُ کھولانی گونءَ ھمدردی بہ کن اَنت۔
بنشون: درشان اکس: وی بی ایم پی
