بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ بی وائی سی ءِ نیمگ ءَ برجاھیں ماھی مھم ءِ رد ءَ بلوچستانءَ انسانی ھکانی لگتمالی ءُ گل ءِ سروکانی درکانودی دزگیریانی بگیری ءَ برجاھیں مھم ءِ رد ءَ نوزدہ مارچ ءَ سوراب ءَ مراگشے برجم دارگ بوتگ۔
آئیءَ گوشتگ کہ اے مراگش ءَ مردماں تران کرتگءُ گوشتگ کہ پہ پر ایمنیں توارانی دارگ ءَ پابندی گیش بوگ ءَ اَنت ءُ کانود پہ ایرادگریانی دارگ ءَ کارمرز کنگ بوگ ءَ اِنت۔ چہ ایشی بلوچستانءِ مردم جتائیں جیڑہ ءُ جنجالانی دیمپان اَنت۔
آیاں زور بیگواھیں مردمانی گپ جتگ ءُ گوشتگ کہ اے وھد ءَ بازیں کچے ءَ مردم پہ وتی آزیزانی واتریءَ وداریگ اِنت۔
آیاں گوشتگ کہ ڈاکٹر ماہ رنگ بلوچ ءُ بی وائی سی ءِ سروکانی دزگیری یک سکا ٹوھیں جیڑھے کہ آیاں گوں پر ایمنی ءَ پہ وتی ھکاں توار چست کرتگ۔
بی وائی سی ءِ گوشگ اِنت کہ پابندی ءُ جنجالاں ابید اے سوبمندیں مراگش ھمے گپ ءَ پیش دار ایت کہ مردمانی پہ وتی مول ءَ ارادہ مھکم اِنت۔
بنشون: درشان اکس: بی وائی سی
