شال: پولیس ءُ انتزامیہ ءَ شال پریس کلب ءَ بلوچ یکجھتی کمیٹی (بی وائی سی) ءِ دزگیر کرتگیں سروکانی کھول پریس کانپرنس ءَ نہ اِشتگ اَنت۔
اھوالکار ءِ رد ءَ پولیس ءَ شال پریس کلب ءِ دیم ءَ کارمند اوشتارینتگ اَنت ءُ ماہ رنگ بلوچ ءَ ھوار آدگہ دزگیریں سروکانی کھولاں پریس کانپرنس کنگ ءِ موکل نہ داتگ ءُ آیاں پریس کلب ءِ ڈن ءَ گوں رسانکدر ءَ تران کنگ ءِ جھد کرتگ اود ءَ ھم پولیس ءَ دزمانجی کرتگ۔
آیاں گوشتگ کہ بی وائی سی ءِ دزگیریں سروکاں یک سالے سرجم بوتگ کہ زندان ءَ بندیگ اَنت۔ ما ھمے درگت ءَ آیانی کیس ءُ ڈاکٹر ماہ رنگ بلوچ ءِ نادراھی ءِ جاورانی سر ءَ پریس کانپرنس کن ایں۔ انگت مارا چہ سھب ءَ پریس کلب ءِ ڈن ءَ داشتگ ءُ گوشتگ اِش کہ پیسر ءَ چہ ڈپٹی کمشنر ءَ این او سی بہ گر اِت۔
کھولانی گوشگ اِنت کہ مئے دیم ءَ آدگہ مردماں پریس کانپرنس کنگ ءِ موکل دیگ بوتگ بلے ما کہ جست کرتگ کہ چہ آیاں این او سی پرچا نہ لوٹگ ءَ اِت۔ ھمے پسہ دیگ بوتگ کہ چہ پرز ءَ گوشگ بوتگ کہ اے کھولاں پریس کانپرنس کنگ ءِ موکل دیگ بہ بیت کہ آیانی زھگ کوھاں شتگ اَنت یا گوں منشیات ءِ کار ءَ اَنت ۔ بلکیں بیگواھیں مردمانی کھول ءُ گوں سیاسی ٹولیاں سیادی داروکیں مردماں موکل دیگ نہ بیت۔
کھولانی گوشگ انت کہ اے جاور ءَ پد ھم ما لاچار بوتگ ءُ پریس کلب ءِ سڑیانی دیم نشتگ ءُ وتی پریس کانپرنس بندات کرتگ، بلے ھمے وھد ءَ پولیس بازیں کچے ءَ اتکگ ءُ اھوالکاران ءَ چہ اد ءَ دور کنگ ءِ جھد کرتگ دانکہ پریس کانپرنس ءَ کوریج دیگ مہ بیت۔
ڈاکٹر ماھرنگ ءِ گوھار ءَ گوشتگ کہ بلوچستان ءَ جاور ھمے ھد ءَ سر بوتگ اَنت کہ مردماں گپ کنگ ءُ جست کنگ ءِ ھم ھک نیست۔
بنشون: پریس کانپرنس اکس: رسانکدر
