بلوچ آجوئی لوٹوکیں سروک رھیم بلوچ ءَ وتی درشانے ءَ گوشتگ کہ زورگریں پاکستانی پوج ءِ گچین کرتگیں اسمبلی ءِ باسک ءُ وتگڑیں سرکار ءِ وزیر زوریں بیگواھی، درکانودی کوش، چیریں آوار جنی ءِ بنجاہ ءُ آزار جاھانی آزار دیوکیں در انسانی ریاستی پالیسی ءُ میارباریانی کانودی رنگ دیگ ءُ پہ کانودی پھازداری ءَ چنچو کانود سازی بہ کن اَنت بلے انسانیت ءِ بگیری ءَ آیانی پوجی سروکانی اے میارباری کانودی ءُ دودمانی ھساب ءَ مدام میارباری گوشگ بنت۔
آئی ءَ گوشتگ کہ وتگڑیں مزن وزیر سرپراز بگٹی ءُ آئی پوجی سروک زورگپتیں بلوچستان ءَ زوریں بیگواھی، چیریں بندیگجاھاں برے نہ من اَنت ءُ برے منّ اَنت۔ بلوچستان ءَ چہ دھکاں برجاھیں زوریں بیگواھی ءُ چیریں آزار جاھانی جیڑہ ءِ سر ءَ ریاستی پالیسی ءُ گپ ھمے چیز ءَ پدر کن اَنت کہ پاکستان ءِ جرنیل ءُ ھندی دلاراں نہ جیڑ اتگ کہ انسانیت ءِ بگیری ءَ وتی میارباریاں بہ من اَنت یا مہ من اَنت۔
رھیم بلوچ ایڈوکیٹ ءَ گوشتگ کہ زورگریں پوج ءِ نیمگ ءَ زورگپتیں بلوچستان ءَ گچین کرتگیں اے اسمبلی ءِ باسک ءُ وتگڑیں سرکار چیر اندری جست ءُ پرس ءُ دروگیں کیسانی چیریں جاھے ءَ آمیدگس ءَ بے پجاریں گواھانی گواھی دیگ ءَ جج ءِ نیمگ ءَ پیسلہ کنگ ءُ سزا دیگ ءَ سیاھیں کانود ءِ منگ ءَ چہ ملامتی ءَ ابید پھر بندگ ءَ گندگ بوگ ءَ اَنت کہ آ چونیں بے زرد، راج دژمن ءُ میاربار اَنت۔
آئی ءَ گوشتگ کہ بلوچستان ءِ وتگڑیں سرکاری وزیر ءُ اسمبلی ءِ باسک اے وتگڑیں کانود سازی ءِ رد ءَ زورگریں پوج ءُ چیریں ادارھانی در انسانی میارباریاں وتی دیم ءَ سیاہ کنگ ءَ اَنت۔
