کیچ: تُربَت پریس کلب ءَ گرینڈ الائنس کیچ ءِ چیردستی ءَ اڈ دیگ بوتگیں ڈی آر اے ءِ نہ رسگ ءُ شال ءَ گرینڈ الائنس ءِ کارکنانی دزگیری ءُ زوراکی ءِ بگیری ءَ زھرشانی کنگ بوتگ۔
زھرشانی کنوکاں پہ وتی ھکاں اوگام جتگ ءُ گوں سرکار ءَ ڈی آر اے ءِ دیگ ءِ لوٹ کرتگ ءُ گوشتگ کہ سرکاری نوکر چہ مزنیں وھدے ءَ اے ھکاں زبھر کنگ بوتگ اَنت۔ ڈی آر اے کہ بلوچستان ءِ نوکرانی بنکی ھک اِنت۔ آدگہ دمگاں وتی نوکراں دیگ ءَ اَنت بلے بلوچستان ءَ نوکر چہ ایشی ءَ زبھر کنگ بوتگ ءُ ھک ءَ دیگ ءَ نہ اَنت کہ اے گوں نوکراں نا انساپی یے۔
آیاں گوشتگ کہ گرانھادی ءِ گیش بوگ ءَ ابید ڈی آر اے ءِ نہ رسگ گوں نوکراں نا انساپی یے۔ اگاں مئے لوٹ منّگ نہ بوت اَنت گڑا ما وتی زھرشانی ءَ گیش ترند کن ایں۔
زھرشانی کنوکاں زی شال ءَ گرینڈ الائنس ءِ کارکنانی دزگیری گوں ترندی ءَ ایر جتگ ءُ گوشتگ کہ پرایمنیں زھرشانی ھر شھری ءِ راھبندی ھک اِنت۔ ایشی ءَ پہ زور دارگ ءَ اوپار نہ کن ایں ءُ ما چہ وتی لوٹاں یک گامے ھم پشت ءَ نہ کنز ایں۔
آیاں دزگیر کرتگیں کارکنانی یل کنگ ءِ لوٹ کرتگ ءُ ھمے جار جتگ دانکہ مئے لوٹ منّگ نہ بنت مئے جھد برجاہ بیت۔
