ھاران ءَ زی چہ سلاہ بندیں مردمانی شھر ءَ پترگ ءُ کاروائی ءَ پد پوج ءِ نیمگ ءَ بند آرگ جنگ بوتگ۔
بنشون ءِ رد ءَ سلاہ بندیں مردماں زی بیگاہ ءِ چار ءَ ھاران شھر انگر کرتگ ءُ دوشی داں یک ءَ پاکستانی پوج ءُ سلاہ بندانی میان ءَ جتائیں جاھاں جنگ برجاہ بوتگ اَنت۔
انچوش گوشگ بوگ ءَ اِنت کہ چہ برجاھیں جنگاں پاکستانی ءِ پوج ءِ سروگاناں ھوار بازیں کارمند مرتگ ءُ ٹپی بوتگ اَنت۔ پوج ءِ دو بکتر بند گاڑیاں ھوار باز گاڑی تباہ کنگ بوتگ۔ اے میان ءَ پہ سلاہ بندیں مردمانی چارگ ءُ نشانگ کنگ ءَ پوج ءِ نیمگ ءَ بال داتگیں کواڈ کاپٹر ھم جنگ ءُ دور دیگ بوتگ اَنت۔
ھندی بنشون ءِ رد ءَ سلاہ بندیں مردماں پولیس تانہ ءِ سر ءَ ارش کنگ ءُ پولیس ءِ گاڑی ءُ سلاھانی تاوان دیگ ءُ برگ ءَ ابید ھمے میان ءَ پاکستانی پوج ءِ مرتگیں کارمندانی سلاہ ھم برتگ اَنت۔
سلاہ بندیں مردمانی نیمگ ءَ کاروائی ءِ میان ءَ گوں مردماں گپ کنگ، زندان ءَ بندیگیں مردمانی یل کنگ ءُ پاکستانی پوج ءِ سر ءَ ارش کنگ ءِ تامربند ھم ماں رسانکدر ءَ شنگ کنگ بوتگ اَنت۔
ھاران ءِ اے کاروائی چہ بلوچ سلاہ بندیں گلانی نیمگ ءَ بیتگیں کاروائیانی لڑا یک مزنیں کاراوئی یے زانگ بوگ ءَ اِنت۔
چہ ایشی ءَ پیش بلوچستان ءَ اے وڑیں کاروائیانی زمہ واری بلوچ آجوئی لوٹوکیں گلاں زرتگ اَنت، بلے اے کاروائی ءِ زمہ واری انگت ءَ ھچ گل ءَ نہ زرتگ۔
