بلوچ لبریشن آرمی (بی ایل اے) ءِ جارکش جیئند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مستونگ، تربت،کوھلو ءُ چمالنگ ءَ چار جتائیں کاروائیاں زورگریں پاکستانی پوج تاوان داتگ ءُ کمپنیانی پھازدار دزگیر کرتگ ءُ سلاہ پل اِتگ اَنت۔
آئی گوشتگ کہ بی ایل اے ءِ سرمچاراں گوستگیں روچ ءَ مستونگ ءِ ھند دشت جلوگندان ءَ پاکستانی پوج ءِ پیادگیں کارمند ھما وھد ءَ سنگر گپتگ ءُ نشانگ کرتگ اَنت کہ آ ریل ءِ پٹڑی ءِ چارگ ءَ بوتگ اَنت۔ اُرش ءِ آسر ءَ زورگریں پوج ءِ دو کارمند جاھی مرتگ ءُ یکے ٹپی بوتگ ءُ تتکگ ۔
آئی گوشتگ کہ بی ایل اے ءِ سرمچاراں گوستگیں روچ ءَ تربت شھر ءَ پارک ھوٹل ءِ نزیک ءَ زورگریں پاکستانی پوج ءِ چوکی گوں دستی بمب ءَ نشانگ کرتگ جانی ءُ مالی تاوان داتگ۔
جاکش ءَ گوشتگ کہ بی ایل اے ءِ سرمچاراں گوستگیں روچ ءِ بیگاہ ءَ کوھلو ءِ ھند سنھڑی ءَ گیس ءِ شرکت ءِ سر ءَ اُرش کرتگ ءُ اود ءَ ساڑی ئیں کارمند انی سلاہ پل اِتگ اَنت ءُ کارمند کڈن کنگ ءَ پد یل داتگ اَنت۔
آئی گوشتگ کہ یک دگہ کاروائی یے ءَ بی ایل اے ءِ سرمچاراں چمالنگ ءَ ٹرپل موڑ ءَ اشکر کمپنی ءِ پھازدارانی چوکی ءِ سر ءَ اُرش کرتگ ءُ اود ءَ ساڑی ئیں کارمند دزگیر کرتگ ءُ آیانی سلاہ پل اتگ اَنت ھندی مردم بوگ ءِ بنیاد ءَ کارمند کڈن کرتگ ءُ یل داتگ اَنت۔
جارکش ءَ گوشتگ کہ بی ایل اے لُٹ ءُ پلی کمپنیانی گون ءَ بندوکیں مردماں تچک ءَ گوش ایت کہ اے کمپنیانی پھازداری کنگ ءُ آ دگہ آسراتی دیگ ءَ پھریز بہ کن اَنت۔ اے وڑیں کاراں ھواریں مردم وتی جانی ءُ مالی تاوان ءِ زمہ وار وت بہ اَنت۔
جئیند بلوچ ءَ درشان ءِ گڈی ءَ چاریں کاروائیانی زمہ واری من اِتگ۔
