اسلام آباد ءَ کائد آزم یونیورسٹی ءَ پہ سئید بلوچ ءِ زوریں بیگواھی ءَ برجاھیں زھرشانی نندانک ءِ نھمی روچ ءَ روانکے کشگ بیتگ۔ روانک ءَ بچک ءُ جنکیں نودربراں بازیں کچے ءَ بھر زرتگ۔
زھرشانی کنوکیں نودربراں سئید بلوچ ءِ اکس، بینر ءُ پلے کارڈ دستاں بیتگ کہ آیاں پہ سئید بلوچ ءِ آجوئی ءَ اوگام جتگ۔
زھرشانی کنوکیں نودربراں تران کرتگ ءُ گوشتگ کہ سئید بلوچ ءِ زوریں بیگواھی ءَ پنچ ماہ گوستگ انگت ءَ آئی ھچ وڑیں ھال نیست۔ پہ سئید بلوچ ءِ زوریں بیگواھی ءَ ھپتگے ءَ گیش اِنت کہ زھرشانی کنگ بوگ ءَ اِنت چہ انتزامیہ ءِ نیمگ ءَ پہ آئی آجوئی ءَ دلجمی دیگ بوتگ بلے انگت ءَ ھچ وڑیں گامگیج زورگ نہ بوتگ۔
آیاں گوشتگ کہ سئید بلوچ ءِ زوریں بیگواھی تھنا آئی جند ءِ بیگواھی ءِ جیڑہ نہ اِنت بلکیں سرجمیں یونیورسٹی ءِ نودربرانی جیڑہ اِنت۔ چی ءَ کہ یونیورسٹی ءِ انتزامیہ ھم پہ نودربرانی نشان کنگ ءُ ادارھانی کمک ءَ گون اَنت۔
آیاں لوٹ کرتگ ءُ گوشتگ کہ سئید بلوچ زوت آجو کنگ بہ بیت اگاں آئی سر ءَ چونیں ھم بھتامے ھست گڑا آمیدگس ءَ پیش کنگ بہ بیت۔
