بلوچ لبریشن آرمی ( بی ایل اے ) ءِ جارکش جیئند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں سرجمیں بلوچستان ءَ ترندیں ارشاں زورگریں پاکستانی پوج، پولیس ءُ وتگڑیں کشندہ ٹولی ءِ کارمند نشانگ کرتگ اَنت۔ سرمچاراں مزنیں شھدگ داں باز اداراں بستگ اَنت ءُ ھنداں تر ءُ گرد کرتگ۔ سرجم ءَ بیست ءُ نُھ ارشاں زورگریں پاکستانی پوج ءِ بیست ءُ ھپت کارمند مرتگ ءُ ھبدہ ءَ گیش ٹپی بوتگ۔ اے اُرش چہ بیست ءُ ھشت نومبر ءَ داں سی نومبر ءِ میان ءَ بوتگ اَنت۔
جارکش ءِ رد ءَ اے ارش گْوادر ءِ ھند پسنی، جیونی، مستونگ شھر، شال ءِ ھند ولی جیٹ، کمبرانی دگ، منیر اھمد دگ، کیچی بیگ، کیچ ءِ ھند تُربت شھر، گنہ، مند، زامران، بلیدہ گلی، تمپ گومازی، ھزدار ءِ ھند اورناچ باران، پَنجگُور ءِ ھند کاٹاگری، سبزاپ، وشبود، کلات ءِ ھند شیکڑی، مورگند ءُ شاہ مردان ءَ کنگ بیتگ اَنت۔
آئی ءِ گوشگ اِنت کہ گْوادر ءِ ھند جیونی ءَ ایم آئی ءِ کارمند ھما وھد ءَ گوں تراکناکیں شورھاں نشانگ کرتگ اَنت کہ آ چہ گاڑیاں زر گرگ ءَ روگ ءَ بوتگ اَنت۔ تراک ءِ آسر ءَ سے کارمند مرتگ ءُ دو سکا ٹپی بوتگ۔
جارکش ءِ رد ءَ بی ایل اے ءِ سرمچاراں مند بلو، اورناچ دوراھی ءُ پنجگُور کاٹاگری ءَ دگ بستگ ءُ گاڑی پٹ ءُ پول کرتگ۔
جارکش ءِ رد ءَ پَنجگُور ءِ ھند سبزاپ ءُ وشبود ءَ پولیس ءُ لیویز تانھانی سر ءَ اُرش کرتگ ءُ توپک ءُ آدگہ سرکاری سامان برتگ اَنت۔
جیئند بلوچ ءَ درشان ءِ گڈی ءَ درسیں کاروائیانی زمہ واری منّ اتگ ءُ ارشانی ترند کنگ ءِ بیھار داتگ ءُ گوشتگ کہ بلوچ راج چہ پاکستانی پوج ءُ آئی کمکاراں وت ءَ دور بدار اَنت۔
