بلوچ یکجھتی کمیٹی (بی وائی سی) ءَ وتی شنگ کرتگیں درشانے ءَ گوشتگ کہ 29 نومبر 2025 ءَ پاکستانی پوج ءَ کیچ ءِ ھند ھوشاپ ءَ بے میاریں شھری نشانگ کرتگ اَنت۔
آئی گوشتگ کہ پاکستانی پوج ءَ باز گولا آس داتگ کہ آ نزیکیں گسے ءَ کپتگ اَنت۔ تراکانی آسر ءَ گس تباہ بوتگ ءُ لھتیں زھگ سکا ٹپی بوتگ کہ دردانگ ءِ امر یازدہ سال،تاھرہ ءِ امر دوازدہ سال، آسیہ ءِ امر ھژدہ سال اِنت ءُ یاسمین سیزدہ سال اِنت۔
آئی گوشتگ یاسمین ءُ تاھرہ سکا ٹپی اَنت کہ آیانی پاد ءُ سرین ءِ ھڈ پرشتگ اَنت۔ دوئیں زھگ پہ گیشیں الاج ءَ کراچی ءَ برگ بوتگ اَنت بلے اود ءَ یاسمین ٹپانی درد نہ سگ اِتگ ءُ بیران بوتگ ءُ آدگہ زھگ الاج کنگ بوگ ءَ اَنت۔
بی وائی سی ءَ گوشتگ کہ میتگانی تہ ءَ اے وڑیں اُرش ریاستی زوراکیانی بھرے کہ چہ سالاں ھندی مردم اے گپ ءَ جنگ ءَ اَنت۔ شھری آبادی گیشتر جنین ءُ زھگ مچی سزا، بمبگواریانی نشانگ کنگ بوگ ءَ اَنت۔ چہ اے وڑیں یکشلیں ویلاں ترس، بے پھریزی ءُ سسائی نادراھی ءَ گیش کنگ بوتگ اَنت۔
بی وائی سی ءَ گوں اکوام متھدہ ءِ انسانی ھکانی کونسل ءُ جھانی انسانی ھکانی گلاں، گیشتر ایمنسٹی انٹرنیشنل ءُ ھیومین رائٹس واچ ءَ لوٹ کرتگ آ اے ناھکیں بگیری ءُ بلوچستان ءَ شھریانی بگیری ءَ برجاھیں زوراکیانی سر ءَ گامگیج بہ زور اَنت۔
