بلوچ اسٹوڈنٹس کونسل پیسل آباد ءَ وتی شنگ کرتگیں درشانے ءَ گوشتگ کہ بلوچ اسٹوڈنٹس کونسل پیسل آباد وتی سیمی سال ءِ لبزانکی ءُ زانِشتی مراگش ءَ نَمیرانیں ساجِد ھسین ءِ نام ءَ برجم داریت۔
آئی ءَ گوشتگ کہ بی ایس سی ءِ سالی لَبزانکی ءُ زانِشتی مراگشانی مول ءُ مراد تھنا اے نہ اِنت کہ بلوچ نودربراں پہ یک ساھتے ءَ وشاں بہ کن ایں بلے بی ایس سی ءِ مراگشانی بُنکی مول ءُ مُراد بلوچ نودربراں راجی سرپدی دئیگ اِنت ءُ بلوچ نودربرانی ھیالاں گوں راستی ءَ ھمگرنج کنگ اِنت۔ بی ایس سی ءِ مراگشانی لوٹ بلوچ نودربر باسکاں زانت ءُ سماء ءِ دئیگ اِنت۔ اے دمگ ءِ اندر ءَ کہ بلوچ نودربر پہ وانگ ءُ زانگ ءَ اتکگاں، اشاں راستی ءِ پیش دارگ اِنت، چوش نا اِنت کہ اِدا بلوچ نودربر تھنا یک مچی ئے ءِ ڈول ءَ ببنت، بلکیں اِشانی راستیں اسکولنگ ءِ ڈُبّہ بی ایس سی ءَ وتی کوپگاں زرتگ۔ بی ایس سی ءِ راہ گِیشیتگیں راھے ءُ اے راھ بلوچ نودربراں نوکیں وھد ءِ لوٹ ءُ زانِشتی سرپدی ءِ دئیگ اِنت ءُ اے بی ایس سی ءِ سِتک ءُ ایمان اِنت۔
آئی ءَ گوشتگ کہ بی ایس سی ( پیسل آباد ) وتی سیمی سال ءِ لبزانکی ءُ زانِشتی مراگش ءَ نَمیرانیں ساجد ھسین ءِ پکر ءُ پلسپہ ءِ نام ءَ اڈ دئیگ ءَ اِنت۔ نَمیرانیں ساجِد ھسین بلوچ چہ سیاسی جنز ءِ بامرداں یک بامردے زانگ بیت۔ نَمیرانیں ساجِد ھسین ءِ ھیال ءُ شھزانتی مدام پہ بلوچ راج ءُ بلوچ گھبود ءِ گھتری بوتگ۔ ساجد ءَ وتی سرجمیں زند پہ بلوچ مھلوک ءَ ندر کُتگ۔ آئی جند ءِ میتگ ءَ بُرّیتگیں پند بہ بنت یا پہ بلوچ ءَ درانڈیھی، ھر ساھت ءَ پہ بلوچ ءَ جھد ءَ بوتگ۔ ساجد ءَ گشتگ کہ، ” ھر کس وت ءَ راستی ءِ کوھے سرپد بیت، بلے راستیں ءُ بامردیں مردم ھما اِنت کہ آ زانت راستی آئی ءَ تاوان دنت، بلے انگت راست گُوش ایت ءُ راستیں ھبر کنت۔” ھمے راستی ءِ منوگریں ساجد کہ داں وتی گُڈی ساہ ءَ راستی ءَ پہ بلوچ راج ءَ پدّر کنگ ءَ اَت، ناشریں دژمن ءَ ساجد ءِ گُشتگیں گپ راست کتاں ءُ ساجد ءَ تاوان دات ءُ ساجد نَمیرانیں بامردانی لَڑ ءَ ھوار بوت۔
