بلوچ نیشنل موومنٹ ( بی این ایم) ءِ نیمگ ءَ جرمنی ءِ بنجاھی شھر برلن ءَ بلوچ شھیدانی سالروچ ءِ درگت ءَ برجم داشتگیں دیوان ءَ پارٹی ءِ چیئرمین ڈاکٹر نسیم بلوچ ءَ تران کرتگ ءُ گوشتگ کہ پاکستان مارا گوں تیراں بے توار کنگ لوٹگ ءَ اِنت، بلے آئی زوراکیاں مئے دل ءَ آجوئی ءِ لوٹ ءُ واھشت گیش کرتگ۔
آئی ءَ گوشتگ کہ 27 مارچ 1948 ءَ پاکستانی پوج ءَ گوں توپاں بلوچستان دستیگ کرتگ۔ مرچی ھم مئے سرڈگار یک لشکری بنجلے ءُ مردم ترس آماچ اَنت۔ بلوچ ورنایانی زوریں بیگواھی ءُ ژانگولیں لاشانی چگل دیگ ءِ درچ انگت ءَ برجاہ اِنت بلے بلوچ راج چہ گھگیری ءَ پد نہ کنز اتگ۔
ڈاکٹر نسیم بلوچ ءَ گوشتگ کہ گوست ءَ ھم بلوچ جھد یک جوزگے ءِ دوشم ءَ بیتگ، بلے آ وھد ءَ گل ءُ شوربندی ءِ کمی بیتگ، بی این ایم ءَ درسیں جوزگ یک مھکمیں گھگیری یےءِ راھبند داتگ اَنت ءُ بلوچ سیاست چہ ٹک ءُ زاتی نپاں کش اتگ ءُ گوں راجی نپاں بندوک کرتگ۔
آئی ءَ گوشتگ کہ بی این ایم ءَ دیمونیانی لیکہ ءُ جھد یک ھواریں پرزے جوڑ کرتگ۔ چہ ایشی برورد ءَ مرچی ھم بلوچ راجی زرمبشت لیکھی، سیاسی ءُ گل ءِ بنیاد ءَ مھکم اِنت۔
ڈاکٹر نسیم بلوچ ءَ درسیں بلوچ راھشون ءُ کارکنانی دیمونی ستک شانی ندر کرتگ اَنت کہ آیانی تہ ءَ ھان مھران ھان، گلام مھمد بلوچ، ڈاکٹر منان بلوچ، بانک کریمہ بلوچ، استاد الی جان، ھاجی رزاک ءُ زبیر بلوچ ھوار اَنت۔
آئیءَ گوشتگ کہ اے توپک ءِ نہ ایمان ءِ جنگ اِنت ءُ گوستانک مدام ایمان ءِ دیم ءَ سرجھل کنت۔
آئی ءَ گوشتگ کہ اگاں برتانیہ ءِ بیرک بلوچستان ءَ گندگ نہ بیت بلے ایردستی ءِ سانکل دگہ یک نوکیں دروشمے ءَ ھست اَنت۔ مرچی بلوچستانءِ سر ءَ لندن نہ اسلام آباد زورگپت اِنت۔
ڈاکٹر نسیم بلوچ ءَ 13 نومبر 1839 ءِ بابت ءَ تران کرتگ ءُ گوشتگ کہ ھمے روچ ءَ برتانیہ ءِ پوجءَ کلات انگر کرتگ گڑاھان مھراب ھان ءَ چہ ایردستیءِ منگ ءَ ابید شھیدی گچین کرتگ ءُ بلوچ ءِ گھگیری ءِ بنیاد ایر کرتگ۔
آئیءَ گوشتگ کہ نواب مھراب ھان ءِ کِر ءَ توپ نہ بیتگ بلے زانشتءِ توانمندی بیتگ ءُچہ زانت ءَ چکاریں راج کدی ھم ھلاس نہ بنت۔
ڈاکٹر نسیم بلوچ ءَ گوشتگ کہ بلوچ راج ءِ جھد تھنا پہ وتی سرڈگار ءَ نہ اِنت بلکیں پہ انسانی شرپ ءُ انساپ ءَ اِنت۔ مئے زبان جتا اَنت بلے ٹپ یک اَنت پمشکا مارا یکجاہ بوگ ءُ توار کنگی اِنت، زوراکیانی بگیری ءُ پہ آجوئی ءَ یکجاہ بوگی اِنت۔
