بلوچ لبریشن آرمی(بی ایل اے) ءِ جارکش جیھند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں یک چیریں ھالے ءَ پد ءَ کاروائی کرتگ ءُ پاکستانی پوج ءِ چریک ءُ سلاہ بندیں ٹولی ءِ سروک شاکر ساداللہ لانگو گوں سنگتاں کشتگ۔
آئی گوشتگ کہ کلات ءِ ھند منگچر ءِسربند ءَ بی ایل اے ءِ سرمچاراں زورگریں پاکستانی پوج ءِ چریک ءِ بندر ءِ سر ءَ اُرش کرتگ۔ سرمچارانی اُرش ءَ سلاہ بندیں ٹولی ءِ سروک شاکر ساداللہ لانگو، شاکر ھیر اللہ لانگو، مھمد کریم ء مھمد جھمنند شال ءُ مھمد زاھر ء ھالکداد مرتگ اَنت۔ سرمچاراں چریک ءِ بندر ءَ سلاہ ءُ یک گاڑی یے دستیگ کرتگ۔
آئی گوشتگ کہ شاکر ساداللہ لانگو زورگریں پاکستانی پوج ءِ جوڑ کرتگیں کشندہ ٹولی ءِ سروکی ءَ کنگ ءَ بوتگ کہ آ بازیں آجوئی لوٹوکیں کارکنانی شھیدی ءَ تچک ءَ ھوار بوگ ءُ گساں بیڑ برگ، چادر ءُ چار دیوالیانی لگتمالی، جنین ءُ کماشانی دلسیاہ کنگ ءَ زورگریں پوج ءِ کمکاری ءَ گوں بوتگ۔
آئی گوشتگ کہ ریاستی چریک شاکر ساداللہ لانگو ءَ زورگریں پاکستانی پوج ءَ گاڑیانی زر گرگ ءُ منشیات ءِ باپاری کنگ ءِ سرجم ءَ موکل داتگ۔ چریک پاکستانی پوج ءِ چیردستی ءَ گوں توپک ءِ زور ءَ مردماں دلسیاہ کنگ ءُ آدگہ چاگردی سلکاریاں ھوار بوتگ۔
جارکش ءَ گوشتگ کہ بی ایل اے ءَ شاکر ساداللہ لانگو کڈن ھم کرتگ کہ آ بلوچ بگیریں کاراں دزکش بہ بیت، بلے آئی زورگریں پاکستانی پوج ءِ چیریں ادارہ (ایم آئی) ءِ چیردستی ءَ بلوچ مھلوک ءِ بگیری ءَ میارباریانی تہ ءَ ترندی آرگ ءَ ھوار بلوچ جھدکارانی بگیری ءَ تچک ءَ کار ءَ بوتگ۔
جارکش ءَ گوشتگ کہ اے میارانی پدّر بوگ ءَ بلوچ لبریشن آرمی ءَ شاکر ساداللہ لانگو ءُ آئی سلاہ بندیں ٹولی کاروائی ءَ نشانگ کرتگ ءُ آ گڈی آسر ءَ سر کرتگ اَنت۔ بی ایل اے بلوچ مھلوک ءِ سر ءَ بیوکیں درسیں زوراکیانی ھساب ءَ چہ زورگریں پاکستانی پوج ءُ آئی شریداراں ھر وڑ ءَ گیت۔ راجی میارباری ءَ ھواریں مردمانی آسر شاکر ساداللہ ءِ وڑ ءَ بیت۔
