کیچ ءِ ھند بلیدہ ءَ چار بیگواھیں ورنایانی ژانگولیں لاش دزکپتگ۔
بنشون ءِ رد ءَ کشگ بیتگیں ورنایانی نام زاکر بلوچ ء ابداللہ، رازک بلوچ ء ابداللہ، سادک بلوچ ءُ پیرجان اِنت کہ چہ آیاں سے ورنا بلیدہ ءِ میتگ زیردان ءِ جاہ منند اَنت ءُ یکے بٹ کورپشت ءَ نشتگ۔
کشگ بیتگیں ورنایانی بابت ءَ گوشگ بیت اے ورنا ھپتگے پیش پہ پکنک ءَ شتگ اَنت چہ ھما روچ ءَ آیانی موبائل نمبر بند بیتگ اَنت۔
مرچی چاریں ورنایانی لاش چہ بلیدہ ءِ کوہ جاڑینءَ دست کپتگ اَنت ءُ آیانی موٹر سائیکل ھم ماندارگ بیتگ اَنت۔
ھندی مردمانی گوشگ اِنت کہ اے چاریں مردم پاکستانی پوجءَ جتگ ءُ کشتگ اَنت۔
چوش کہ دو روچ پیش پاکستانی پوج ءَ چہ شال ءِ چلتن کوہ ءُ کیچ ءِ ھند بلیدہ ءَ ھژدہ سلاہ بندیں مردمانی کشگ ءِ ٹاپار جتگ اَت۔
آئی ءَ گوشتگ اَت کہ چہ بلیدہ ءَ چار سلاہ بندیں مردم کشتگ ءُ آیانی سلاہ ءُ سامان ھم دستیگ کرتگ اَنت۔
چہ ایشی ءَ پیش ھم پاکستانی پوج ءَ چہ بلوچستان ءِ جتائیں ھند ءُ دمگاں زور بیگواھیں مردم دروگیں میڑاں کشتگ ءُ آیان ءَ سلاہ بندیں مردم گوشتگ ءُ میڑ ءِ نام داتگ اَنت۔
