بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ مرچی بی وائی سی ءِ بندیگیں سروک ڈاکٹر ماہ رنگ بلوچ، سبگت اللہ شاہ جی، بیبرگ بلوچ، گلزادی بلوچ ءُ بیبو بلوچ ءِ کیس ءِ بابت ءَ ٹی سی کورٹ 1ءَ بیل ایپلیکشز ءِ رد ءَ پیشی بیتگ۔ اے پیشی ءَ نُھ ایپ آئی آر ءِ سر ءَ گپ جنگ بیتگ کہ ایشی ءِ سر ءَ آمیدگس ءَ شش نکات ءِ سر ءَ دلگوش کرتگ ءُ داں شش نومبر ءَ پیسلہ کنت۔
آئی ءَ گوشتگ کہ بی وائی سی ءِ سروک گوستگیں ھپت ماہ اِنت کہ بندیگ اَنت۔ آ داں سے ماہ ءَ تھری ایم پی او ءِ رد ءَ درکانودی بندیگ کنگ بیتگ اَنت، ءُ رند ءَ آیانی سر ءَ دروگیں کیس جنگ بیتگ ءُ وتی دل ءِ تب ءَ ایپ آئی آر کرتگ ءُ یکشل ءَ بندیگ کنگ ءَ اَنت۔ اے کار نہ تھنا بنکی انسانی ھکانی بگیری اِنت بلکیں سیاسی بیرگیری ءُ ریاستی زوراکیانی منانک اِنت۔
آئی ءَ گوشتگ کہ بی وائی سی چو مدامی وڑ ءَ زوراکی،ناھکی ءُ زوریں بیگواھیانی بگیری ءَ توار چست کنگ ءَ اِنت۔ ما بلوچستان ءَ بیوکیں انسانی ھکانی ناھکیں بگیریاں مدام جھانءِ دیم ءَ آرگ ءُ زوراکیانی گوں جمھوری ءَ دیم پہ دیمی کنگءُ سیاسی پارست ءَ جھانءِ دیم ءَ ریاست ءِ وتی دستاں آئین ءِ لگتمالی ءَ پیش کنگ ءَ ایں۔
