شال ءَ پہ بیگواھیں مردمانی پدجنگ ءَ وائس پار بلوچ مسنگ پرسن ءِ زھرشانی گدانءَ 5983 روچ سرجم بیتگ۔ چارشمبے ءِروچ ءَ گل ءِ ایگزیکٹوکمیٹی ءِ باسک نیاز مھمد گدان ءَ ساڑی بیتگ۔
زور بیگواھیں سگیر اھمد ءُ اکرار بلوچ ءِ کھول گدانءَ اتکگ ءُ وتی زھرشانی یاداشت کرتگ۔
چوش کہ سگیر اھمد ءُ اکرار بلوچ یکیں کھول ءِ مردم اَنت ءُ آواران ءِ ھند تیرتیج ءِ جاہ منند اَنت کہ پاکستانی پوج ءَ 11 جون 2025 ءَ چہ اورماڑہ ءَ آوار جتگ ءُ بیگواہ کرتگ اَنت۔
کھولءِ گوشگ اِنت کہ ماپہ وتی ازیزانی آجوئی ءَ ھمک در ٹک اِتگ بلے مارا انگت ءَ آیانی بابت ءَھچ وڑیں سرپد نہ رستگ چہ ایشی سوب ءَمئے کھول جنجالانی دیمپان ا ِنت۔
نیاز مھمد بلوچ ءَ چہ سرکار ءُ ڈیھءِ ادارھاں لوٹ کرتگ کہ آ زوریں بیگواھیانی سرجم ءَ ھلاس کنگ ءَ زوت گامگیج بزوراَنت۔ اگاں سگیر اھمد ءُ اکرار بلوچ ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بنت۔
