شال: دوشی اوگانستان ءِ نیمگ ءَ پاکستان ءِ سر ءَ بیتگیں ارشانی بابت ءَ پاکستانی پوج ءِ رسانکدری بھر آئی ایس پی آر ءَ وتی درشان ءَ گوشتگ کہ گوں تالبان پوج ءَ میڑ ءَ پاکستانی پوج ءِ 23 کارمند مرتگ ءُ 29 ٹپی بوتگ ءُ تالبان ءِ بازیں چوکی ءِ تباہ کنگ بوتگ۔
آئی ءَ گوشتگ کہ 11 ءُ 12 اکتوبر ءِ میانی شپ ءَ اوگان تالبان ءُ ٹی ٹی پی ءَ پاکستان ءُ اوگان سیمسر ءَ پاکستان ءِ سر ءَ ارش کرتگ۔
پاکستانی پوج ءَ ٹاپار جتگ ءُ گوشتگ کہ اے میڑ ءَ اوگان پوج ءَ ھم باز تاوان بوتگ۔
آئی گوشگ اِنت کہ پاکستان ءِ زمینی ءُ برزی پوج ءَ تالبان ءِ بازیں بنجل ءُ سنگر نشانگ کرتگ اَنت۔
