گوادر ءَ ورگی آپ ءِ نیستی ءِبگیری ءَ جی ڈی کارگس ءِ دیم ءَ زھرشانی کنگ بیتگ کہ اے زھرشانی ءَ جتائیں سیاسی پارٹیانی سروک ءُ کارکنان بازیں کچے ءَ بھر زرتگ۔
زھرشانی کنوکیں مردماں پلے کارڈ دستاں بیتگ کہ آیانی سر ءَ جتائیں اوگام نبشتہ بیتگ اَنت۔
آیاں تران کرتگ ءُ گوشتگ کہ اے آپ ءِ جیڑہ مرچیگیں جیڑھے نہ اِنت بلکیں ھمک دو سے سال ءِ سر ءَ گوادر ءِ مردم ھمے جیڑہ ءِ دیمپان بوگ ءَ اَنت۔ اے جیڑہ ءَ انتزامیہ ھم سرپد اِنت بلے چہ مردمانی بزگی ءَ پیش پہ اے جیڑہ ءِ گیش ءُ گیوار کنگ ءَ گامگیج نہ زور ایت۔
آیانی گوشگ اِنت کہ ھمے آپ ءِ نیستی ءِ سوب ءَ مئے مات ءُگھاراں وتی کسانیں زھگ گوں اَنت ءُ پہ ورگی آپ ءِ گرگ ءَ اے کارگس ءُ آ کارگس ءَروگ ءَ اَنت۔ آیانی اے جنجالانی پہ اد ءِ سرکاری جھگیراں شرم ءِ گپے اِنت۔
آیاں گوشتگ کہ اگاں مئے لوٹ منگ نہ بیت اَنت ءُ آپ ءِ جیڑہ گیش ءُ گیوار کنگ نہ بوت گڑا ما وتی زھرشانی ءَ گیش ترند کن ایں۔
