کیچ: بالگتر ءَ بلوچستان لبریشن پرنٹ ( بی ایل ایپ ) ءِ نیمگ ءَ پاکستانی پوج ءِ بنجل ءِ دستیگ کنگ ءَ پد پاکستانی پوج ءِ ھیلی کاپٹر ءُ ڈرون ترّ ءُ گرد کنگ ءَ اِنت۔
ھندی بنشون ءِ رد ءَ ھیلی کاپٹر مرتگیں پوجیانی لاشاں ھم برگ ءَ اَنت بلے انچوش گمان کنگ بوگ ءَ اِنت کہ پوج ھمے کوہ ءَ لشکرکشی کنت۔
چوش کہ اے اُرش ءِ گپ سرکار ءَ ھم راست کرتگ ءُ گوشتگ اَت کہ اُرش ءِ آسر ءَ سے کارمند مرتگ ءُ چار ٹپی بیتگ۔
اے ارش ءِ زمہ واری دوشی بی ایل ایپ ءِ جارکش میجر گھرام بلوچ ءَ من اتگ ءُ گوشتگ کہ بی ایل ایپ ءِ سرمچاراں بیگاہ ءِ شش ءِ نزیک ءَ بالگتر ءِ تش ءَ چائنہ پاکستان اکنامک کوریڈور ( سی پیک ) دگ ءَ پاکستانی پوج ءِ بنجل چہ جتائیں نیمگاں انگر کرتگ ءُ داں سے ادار ءِ میڑ ءَ پد سرمچاراں بنجل سرجم ءَ دستیگ کرتگ۔
میجر گھرام بلوچ ءَ درشان ءِ گڈی ءَ گوشتگ اَت کہ سرجمیں درشان ءَ زوت رسانکدر ءَ شنگ کن ایں۔
بلوچستان لبریشن پرنٹ ءَ چہ اے بنجل ءِ دستیگ کنگ ءَ پیش ھمے سال ءَ 15 پروری ءَ مند ءَ ھم پاکستانی پوج ءِ بنجل دستیگ کرتگ ءُ چہ ایشی ءَ پپیش ھم دشت، سبدان آدگہ جاھاں ھم پوج ءِ بنجل دستیگ کنگ بیتگ اَنت۔
