اسلام آباد ءَ سانمندیں کھولانی زھرشانی نندانکءَ مرچی ھپتاد روچ سرجم بیتگ کہ انگت برجاہ اِنت۔ کھولاں پہ وتی لوٹانی ھک ءَ چو مدامی وڑ ءَ روانک کشگ ءُ اوگام جنگ ءَ اَنت۔ بلے انگتءَ آیانی لوٹ منگ نہ بیتگ اَنت۔
اے بابت ءَ آیانی گوشگ اِنت کہ مئے زھرشانی ءَ ھپتاد روچ سرجم بیتگ کہ ما اد ءَ گوں پیرزال ءُ کسانیں زھگاں نشتگ ایں بلے چہ اسلام آبادءِ واکدار انی نیمگ ءَ پہ مئے گپاں گوش دارگ ءَ کس نہ یتکگ۔
آیانی گوشگ اِنت کہ اد ءَ واکدار چہ مئے پر ایمنیں توار ءِ گوش دارگ ءَ ابید آ مدام گوں زوراکی ءَ مارا کمشرپ کنگ لوٹگءَ اَنت۔
آیانی گوشگ اِنت کہ مئے لوٹ ھمے ڈیھ ءِ آئین ءُ کانود ءِ ھساب ءَ اَنت۔ بلوچ یکجھتی کمیٹی ءِ بندیگیں سروک ءُ زور بیگواھیں مردم آجو کنگ بہ بنت، اگاں کسے ءِ سر ءَ چونیں بھتامے ھست گڑا وتی جند ءِ آمیدگس ءَ پیش بہ کن ءُ ڈیھ ءِ کانود ءِ ھساب ءَ سزا بدے۔ بلے ریاست مئے کانودی لوٹانی منگ ءَ جاڑیگ نہ اِنت۔
