سبی: پاکستانی چیریں ادارھانی کارمنداں اھوالکارے آوار جتگ ءُ بیگواہ کرتگ۔
اھوالکار ءِ رد ءَ بیگواہ کرتگیں اھوالکار ءِ نام شیر ھان مری اِنت کہ کوھلو ءِ جھمنند اِنت۔ 12 ستمبر 2025 ءَ چیریں ادارھانی کارمند ءُ پولیس ءَ آوار جنگ ءَ پد بیگواہ کرتگ۔
آئی کھول ءِ گوشگ اِنت کہ شیر ھان مری ءِ بیگواھی ءَ پد انگت مارا آئی بابت ءَ ھچ سرپدی دیگ نہ بوتگ۔ شیر ھان ماں رسانکدر ءَ پہ بیگواھیں مردماں توار چست کرتگ آ وتی بے میاریں راج ءِ توار جوڑ بوگ ءِ بنیاد ءَ بیگواہ کنگ بوتگ۔
کھول ءِ گوشگ اِنت کہ پاکستان ریاست ءِ زوراکیانی بگیری ءَ توار چست کنگ میارے جوڑ بوتگ۔ ھر کس ءَ کہ توار چست کرت آ بیگواہ کنگ بیت دانکہ مردمانی تہ ءَ ترس ودی بہ بیت ءُ زوراکی ءِ بگیری ءَ توار چست مہ کن اَنت
شیر ھان مری ءِ کھول ءَ گوں بلوچ راج ءَ لوٹ کرتگ کہ پہ شیر ھان مری ءِ آجوئی ءَ توار چست بہ کن اِت
