بلوچ وومن پورم ءِ سروک ڈاکٹر شلی بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ آواران ءِ جاہ منند سگیر بلوچ گوں وتی ناکوزتک اکرار بلوچ ءَ چہ اورماڑہ ءَ ھما وھد ءَ آوار جنگ بیتگ کہ آ کراچی ءَ روگ ءَ بیتگ اَنت۔ آیانی بابتءَ انگت ءَ ھچ وڑیں ھال نیست کہ آ ریاستی ادارھانی چیریں آزارا جاھاں درکانودی بندیگ اَنت۔ ریاست ءِ اے گامگیج دودے جوڑ بیتگ ءُ ایشی مول لس بلوچانی جھد ءِ دارگ اِنت، بلے ایشی بگیری گوں ترندی بوگ ءَ اِنت۔ چی ءَ کہ لس مھلوک ریاستی زوراکیاں نہ من ایت۔
آئی ءَ گوشتگ کہ زوریں بیگواھیاں مھلوک ءِ گوں ریاست ءُ آئی ادارھاں نزیکی ھلاس کرتگ۔ زوریں بیگواھی سکا مزنیں جیڑھے لس مھلوک ریاستی درکانودی زوراکیانی دیم پہ دیمی ءَ کنگ ءَ اِنت۔ اگاں کسےءِ سر ءَ بھتامے ھست گڑا آمیدگس ءَ پیش کنگ بہ بیت نیکہ چیریں آزار جاھاں بند کنگ ءُ آزار دیگ بہ بیت۔
ڈاکٹر شلی بلوچ ءَ گوشتگ کہ من سگیر بلوچ ءُ اکرار جنگیان ءَ ھوار پہ درسیں بیگواھیں بلوچانی آجوئی ءَ لوٹ ءَ کن آن ءُ ریاست ءُ آئی ادارھاں زور دیاں کہ آ زوریں بیگواھی ءَ ھلاس بہ کن اَنت۔ زوریں بیگواھی ھچ ھساب ءَ منگ نہ بیت۔
