شال: بلوچ یکجھتی کمیٹی ءِ سروک ڈاکٹر ماہ رنگ بلوچ، سبگت اللہ شاہ جی، بیبرگ بلوچ، گلزادی بلوچ، بیبو بلوچ ءُ ماما گپار بلوچ مرچی پہ ناشرکاری ءِ گِرءُ داریں آمیدگس ءَ پیش کنگ بیتگ اَنت۔ آمیدگس ءَآیان ءَ پہ ریمانڈ ءَ دگہ بیست روچ ءَ پولیسءِ دست ءَ داتگ اَنت۔
آمیدگس ءَ پیشی ءِ وھد ءَ آیانی کھول، لس مردم، سیاسی ءُ چاگردی کارکناں ھواربازیں کچے ءَ مردم پہ آیانی چارگ ءَ اتکگ اَنت۔
چاگردی رسانکدر ءَ شنگ بیتگیں تامربنداں گندگ بیت کہ لس مھلوک ءُ بی وائی سی ءِ سروک گھگیری ءِ اوگام ءَ جنگ ءَ اَنت۔
بی وائی سی ءِ سروک ڈاکٹر ماہ رنگ بلوچ ءَگندُک ءِ میان ءَ گوں مردماں گپ جتگ ءُ گوشتگ کہ شمئے جھد پیسر ءَ ھم برجاہ بیتگ ءُ انگت ءَ برجاہ اِنت۔ ما وتی جھد اے ڈیھءِ کانود ءُ سرجمیں جھانءِ دیم ءَ پیش کرتگ کہ اد ءَ آمیدگس ءُ کانود نیست اے بس پہ بلوچ ءِ چکچینی ءُ بلوچ ءِ مڈیانی لٹ ءُ پل ءَ جوڑ کنگ بیتگ اَنت۔
ڈاکٹر ماہ رنگ بلوچ ءَ گوشتگ کہ انچو بگت سنگ انگریز ءِ آمیدگس ءَ شتگ ءُ آئی کانود پاشک کرتگ ۔ ھمےوڑءَ بی وائی سی ءِ سنگت ءُ آیانی کھولاں پیش داشتگ کہ اے ڈیھ ءِ کانود انساپ دات نہ کنت۔
آئی ءَ گوشتگ کہ ما چنچو وھد ایں بندیگ کنگ بیتگ ایں بس مئے بنیادی ھکانی بگیری کنگ بیتگ۔اے ھکانی بگیری ءَ اے ڈیھ ءِ پارلیمنٹ، ایشی آمیدگس، جج ءُ پولیس درس یک اَنت۔ ھما پولیس ءَ مئے پھازداری کرتگ مرچی گوں سی ٹی ڈی ءَ مئے جنیناں گیت ءُ بارت۔
آئی ءَ گوشتگ کہ ما گوں مردماں ھمے لوٹ کن ایں کہ بلوچستان ءِ تہ ءَ یک کشکے جوڑ کنگ بیتگ کئے نزور ءِ ھمراہ بیت یا کئے زوراک ءِ ھمراہ بیت۔ چہ زندانی کنگ ءَ مارا داشتگ نہ کنت۔
ڈاکٹر ماہ رنگ بلوچ ءَ گوشتگ کہ کجام مردم زندان ءَ بندیگ کنگ بیتگ آئی ایمان گیشتر مھکم بیتگ۔
