گوادر ءِ جاہ منند ءُ زور بیگواھیں ازیم دوست ءِ گھار رکسانہ بلوچ ءِ گوشگ اِنت کہ من بلوچستان ءَ زوریں بیگواھیانی بگیری ءَ توار چست کنگ ءُ پہ وتی برات ءِ آجوئی ءَ زھرشانی کنگ ءَ ترسینگ بوگ ءَ آں۔
رکسانہ بلوچ ءَ گوشتگ کہ من گوادر ءَ ھندی وانگجاہ دی اوئیسس ءَ وانینگ ءَ بیتگ آں کہ چہ انتزامیہ ءِ نیمگ ءَ منی کشگ ءِ کلوہ سر بیتگ۔ من تھنا پہ ھمے گپ ءَ چہ وانگجاہ ءَ کشگ بیتگ آں کہ من پہ وتی برات ازیم دوست ءَ زھرشانی کنگ ءَ آں۔
آئی گوشگ اِنت کہ چہ ایشی ءَ ابید من ءَ گوادر پولیس ءَ تانہ ءَ لوٹ اتگ ءُ اود ءَ داں پنچ اداراں بندیگ بیتگ آں۔ اے میان ءَ آیاں من ءَ زھرشانیاں بھر زورگ ءُ زھرشانیانی بابت ءَ جست کرتگ ءُ ترسینتگ۔
رکسانہ ءِ گوشگ اِنت کہ من پیسر ءَ ھم زانتگ من روچے نہ روچے چہ وانگجاہ ءَ کشگ باں، چی ءَ کہ وانگجاہ ھم بیھارانی دیمپان بیتگ ءُ مرچی وانگجاہ ءِ انتزامیہ ءَ کلوہ کرتگ کہ ترا چہ وانگجاہ ءَ کش اتگ۔
آئی ءَ گوشتگ کہ من وتی جھد ءَ برجاہ دار آں ءُ پہ وتی برات ءِ آجوئی ءَ توار چست کن آں۔
چوش کہ رکسانہ بلوچ ءِ برات ازیم دوست 3 جولائی 2015 ءَ چہ گوادر ءَ زور بیگواہ کنگ بیتگ ءُ آ گوستگیں چنچو سال اِنت کہ پہ وتی برات ءِ آجوئی ءَ گوادر ءَ ھوار جتائیں شھراں روانک، زھرشانی ءُ نندانکاں بھر زورگ ءَ اِنت۔
