بلوچ نیشنل موومنٹ ( بی این ایم ) ءَ وتی شنگ کرتگیں درشانے ءَ گوشتگ کہ بی این ایم ءِ نیمگ ءَ دی ھیگ ءَ پاکستانی سپارتجاہ ءِ دیم ءَ زھرشانی کنگ بیتگ۔ زھرشانی ءِ مول استاد واھد کمبر بلوچ ءِ زوریں بیگواھی ءَ یک سالے سرجم بوگ ءَ میان استمان ءِ دلگوش دیگ ءُ بلوچستان ءَ برجاھیں ریاستی زوراکی ءُ بلوچ چکچینی ءِ بگیری ءَ توار چست کنگ بیتگ۔
آئی ءَ گوشتگ کہ زھرشانی ءَ بی این ایم ءِ باسک ءُ انسانی ھکانی کارکناں بھر زرتگ۔ زھرشانی کنوکیں مردماں بینر ءُ پلے کارڈ گوں بیتگ کہ آیانی سر ءَ جتائیں اوگام نبشتہ بیتگ ءُ گوں میان استمان ءَ لوٹ کنگ بیتگ کہ آ بلوچستانءَ انسانی ھکانی بگیریانی سر ءَ دلگوش بہ دنت۔
بی این ایم نیدرلینڈز ھکین ءِ سرکماش مھیم ابدرھیم، ڈاکٹر لتیپ بلوچ ءُ کدیر ساگر ءَ تران کرتگ ءُ گوشتگ کہ واھد کمبر ءِ آوار جنی بلوچستان ءَ برجاھیں ریاستی زوراکیانی درچ اِنت۔ ھمیشی رد ءَ سیاسی کارکن، نودربر، اھوالکار ءُ لس شھری بیگواہ کنگ بوگ ءَ اَنت۔
تران کنوکاں اکوام متھدہ، یورپی یونین ءُ انسانی ھکانی میان استمانی گلانی گون ءَ لوٹ کرتگ کہ آ بلوچانی توار ءَ گوش بدار اَنت ءُ پاکستان ءَ زور بدے اَنت کہ آ زوریں بیگواھی ءُ درکانودی کوش ءِ وڑیں زوراکیاں بند بہ کنت۔
آیاں گوشتگ کہ بلوچستان ءَ برجاھیں جاور تھنا ھندی جیڑہ نہ اَنت بلکیں انسانی ھکانی میان استمانی تباھی اِنت۔ جھان ایشی گیشتر سر ءَ گوازینت نہ کنت۔ آیاں گوں میان استمان ءِ رسانکدرءَ لوٹ کرتگ کہ آ بلوچستانءِ زمینی راستیاں جھان ءِ دیم ءَ بیار اَنت۔
بی این ایم ءِ نیمگءَ ھمے کول کنگ بیتگ دانکہ بلوچستان ءَ انسانی ھکانی لگتمالی ھلاس کنگ نہ بیت آیانی توار ءَ میان استمان ءَ چست کن ایں۔
