بلوچ یکجھتی کمیٹی ءِ سروک سمی دینءَ گوشتگ کہ ڈاکٹر شلی بلوچ یک توکل ءُ سرگرمیں جنینانی ھکانی کارکن ءُ بلوچ ویمن پورم ءِ بنجاھی سروک مرچی چہ گوادر ءِ ھند سربندن ءَ گوں آئی ٹیم ءَ پولیس ءَ دزگیر کرتگ، اے ھما وھد ءَ دزگیر کنگ بیتگ اَنت کہ ڈاکٹر شلی ءُ آئی سنگت گوادر پریس کلب ءَ پہ یک روچی دیوانے ءَ تر ءُ گرد کنگ ءَ بیتگ اَنت۔ یک پر ایمن ءُ جوانیں کوشستے کہ آئی مول بلوچ جنینانی توار ءِ دیم ءَ آرگ اِنت۔
آئی ءَ گوشتگ کہ ڈاکٹر شلی بلوچ ءِ دزگیری تھنا یک مردمے ءِ دزگیری نہ اِنت بلکیں ھما درسیں توارانی دارگ اِنت کہ بلوچستان ءَ ایمن، برابری ءُ انساپ ءِ گپ ءَ کن اَنت۔ اے ویل بلوچ جنین کارکنانی پرایمن ءُ راھبندی جھد ءِ دارگ ءِ ھما ترسناکیں درچ اِنت کہ آئی ءَ درکانودی دزگیری، ترسینگ ءُ زوراکی کنگ ھوار اَنت۔
سمی دین ءَ گوشتگ کہ ریاست ءَ ھوش سر ءَ کنگی اِنت ءُ بلوچستان ءَ پر ایمنیں سیاسی ءُ چاگردی کارانی میارباری ءِ رنگ دیگ ءِ درچ بند کنگ بہ بیت ءُ ھمک شھری ءَ آئی سرگرامیانی آجوئی، پھازداری ءُ شرپ دیگ بہ بیت۔
