شال: پہ زوربیگواھیں مردمانی پد جنگ ءَ برجاھیں وی بی ایم پی ءِ شد کشیں گدان ءَ 5887 روچ سرجم بوتگ کہ گل ایگزیکٹو کمیٹی ءِ باسک نیاز نیچاری ءِ سروکی ءَ برجاہ بوتگ۔ بلوچستان نیشنل پارٹی زامران ءِ سروک شے ابدُلھک ءُ بی ایس او ءِ سروک شے اتا گدان ءَ آتکگ ءُ گوں زوربیگواھیں مردمانی کھولاں ھمدردی درشان کرتگ ءُ زوربیگواھیانی سر ءَ بژن درشان کرتگ ءُ مردمانی آجوئی ءِ لوٹ کرتگ۔
نیاز نیچاری ءَ گوشتگ کہ گل ءَ اے ھال سر بوتگ کہ بلوچستان ءِ دمگ آواران ءِ ھند جاھو ءَ پاکستانی پوج ءَ یک بیگواھیں ورنایے ھمید ء اپزل کشتگ ءُ آئی لاش چگل داتگ کہ آ جاھو کوٹو ءِ جھمنند اِنت۔ پنچ روچ پیش آ پاکستانی پوج ءَ آوار جتگ ءُ زوربیگواہ کرتگ اَت۔
آئی گوشتگ کہ زوربیگواھیں بلوچ ورنایانی درکانودی کوش ڈیھ ءِ راھبند ءُ انسانی ھکانی بگیری اِنت کہ ایشی ءَ ایر جن ایں ءُ چہ سرکار ءَ لوٹ کن ایں کہ آ اے وئیل ءِ پٹ ءُ پول ءَ بہ کنت راستی ءَ دیم ءَ بْیاریت ءُ اے ویل ءَ ھواریں کارمنداں سزا بہ دنت ءُ وتی راھبندی زمہ واری ءَ پیلو بہ کنت۔
