شال: زی بلوچ یکجھتی کمیٹی ءِ بندیگیں سروک چہ ھدہ جیل ءَ کشگ ءُ سول لائنز پولیس تانہ ءَ برگ بیتگ اَنت۔ چہ برگ ءَ پد آیانی کھولاں گندُک ءَ نیلگ ءَ اَنت۔ سول لائنز ءِ تانہ ءِ کِر ءُ کشانی ھند پہ پھازداری ءِ نام ءَ بند کنگ بیتگ اَنت۔
بلوچ یکجھتی کمیٹیءَ اے کار پاکستان ءِ راھبند ءُ انسانی ھکانی میان استمانی کانود ءِ تچکیں بگیری لیک اتگ ءُ پہ وتی سروکانی زندگی ءُ سلامتی ءِ بابت ءَ بژن درشان کرتگ ءُ گوشتگ کہ مارا انچو گمان بیت کہ مئے سروکانی گون ءَ رستری کنگ ءُ جانی ءُ سسائی زوراکی کنگ بوگ ءَ اِنت۔
آئی ءَ لوٹ کرتگ ءُ گوشتگ کہ بی وائی سی ءِ سروکانی کھول ءُ وکیلاں گوں آیاں زوت گندُک کنگ ءِ موکل دیگ بہ بیت۔ بندیگیں سروکانی گون ءَ ھچ وڑیں زوراکی کنگ مہ بیت۔
اے بابت ءَ بی وائی سی ءِ سروک سمی دین ءَ گوشتگ کہ ھما اِنت کہ ڈاکٹر ماہ رنگ بلوچ، بیبو بلوچ ءُ گلزدی بلوچ زی شال ءِ سول لائنز تانہءَ برگ بیتگ اَنت ھما اِنت آیانی کھولاں گندُک ءِ موکل ءَ دیگ ءَ نہ اَنت۔ تانہ سرجم ءَ بند کنگ بیتگ، چہ ایشی ءَ سروکانی پہ وشی ءُ سلامتی ءَ ترس ودی بیتگ۔
آئی ءَ گوشتگ کہ مرچی سرجمیں روچ ءَ ڈاکٹر ماہ رنگ، بیبو ءُ گلزادی ءِ کھول تانہ ءَ ڈن پہ آیانی چارگ ءِ ودار ءَ اوشتوک بیتگ اَنت بلے آیان ءَ تہ ءَ روگ ءِ موکل دیگ نہ بیتگ۔ بیبو بلوچ ءِ پیرزالیں مات ھمود ءَ ساڑی بیتگ۔ سرجمیں روچ ءَ چہ تانہ ءَ ڈن ودار کنگ ءَ تستگ ءُ کپتگ آئی تب ناوش بیتگ۔
بی وائی سی ءِ سروک ءَ گوشتگ کہ چہ ایشیءَ ابید بیبگر بلوچ، شاہ جی بلوچ ءُ گپار بلوچ ءِ ھال ءَ دیگ ءَ نہ اَنت کہ کج ءَ اَنت۔ انچوش گمان کنگ بوگ ءَ اِنت کہ آ کینٹ ءَ یا دگہ چیریں جاھے ءَ برگ بیتگ اَنت۔ ما ھمے ترسگ ءَ ایں کہ آیاں بندیگجاہ ءَ رستری آزار دیگ بنت۔
