بلوچ یکجھتی کمیٹی ءِ سروک ءُ زوربیگواھیں ڈاکٹر دین مھمد ءِ جنک سمی دین بلوچ ءَ ماں رسانکدر ءَ وتی شنگ کرتگیں درشانے ءَ بی وائی سی پنجگور ھنکین ءِ ورنائیں باسک زیشان بلوچ ءِ کوش ءِ پژدر ءَ گوشتگ که زیشان بلوچ ءِ ناھکیں کوش تھنا یک کھولے ءِ ناں بلکیں په سرجمیں بلوچستان ءَ ٹپے جوڑ بیتگ ، ھمک گس گم ءَ بار ءُ ھمک زِرد گمیگ اِنت ، اے ویل ایوک ءَ یک مردمے ءِ کوش نه اِنت بلکیں انساپ ، مردمگری ءُ اوست ءِ کوش ءِ دردناکیں کسه اِنت۔
آئی ءَ گوشتگ که یک گسے ءِ سروک زھیر بلوچ ءَ ده سال اِنت که زوربیگواه اِنت ، انوں ھمے گس ءِ یکیں بچک زیشان که په وتی پت ءِ شوھاز ءَ ایمینیں وڑے ءَ جھد ءَ بیتگ آئی ءِ ناھکیں کُشگ بس تھنا یک میارباری یے نه اِنت بلکیں سرجمیں کھول ءِ مچی سزا دیگ ءِ درچ اِنت ، په زیشان ءِ کھول ءَ انچیں مھشرے که آ گوں لبزاں درشان کنگ نہ بیت۔
سمی دین ءَ گوشتگ که وھدے که زوراکی ، رستری ءُ بے راھبندی گوں ریاست ءِ پله مرزی ءَ کنگ بیت گڑا اود ءَ انسان ءِ زند ءَ ھچ وڑیں ارزشت نیست ، بلوچستان ءَ همک روچ لاش دزکپگ ءَ اِنت ءُ نوں جست ھمیش انت که بلوچ په انساپ ءَ کئی دروازگ ءَ به ٹُک ایت ، وتی جیڑھ ءَ کجام آمیدگس ءَ پیش به کنت وھدے که ریاست وت کازی ءُ زوراک اِنت۔
سمی دین بلوچ ءَ وتی درشان ءِ گڈی ءَ گوشتگ که زوربیگواھی ءُ درکانودی کوش بلوچستان ءَ هر روچی کارے جوڑ بیتگ ، په اے گرانیں میارباریاں ناں ریاستی اداره گامیگج زورگ اَنت ناں چونیں کانود ءُ آمیدگسے ءُ ناں که چه آیاں ھساب گرگ بوگ ءَ اِنت ، چوناها اسل گپ ھمیش اِنت که جاورانی سر ءَ نادزرسی پیش بوگ ءَا ِنت اے پہ راجے ءَ سکا ترسناک اِنت۔
