بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ ادیل بلوچ ھشت مارچ 2023 ءَ پوج ءِ دست ءَ بیگواہ کنگ بیت ءُ لھتے ماہ ءَ پد چہ آزار جاہ ءَ آجو بیت ءُ آ مروچی تربت ءَ تیر باران کنگ ءُ کشگ بیت۔ بلوچ ءِ چُکچینی ءَ گوستگیں دو دھک ءَ گیش اِنت کہ برجاہ اِنت ایوک ءَ جون 2025 ءِ ماہ ءَ 22 بلوچ گار ءُ بیگوائیں پُسگانی جون بلوچ راج ءَ را سوگات کنگ بنت۔
آئی ءَ گوشتگ کہ وھدے رسانکدر ءَ تامربندے شنگ بیت کہ یک پتے پہ وتی تاسپیں زھگ ءِ آجوئی ءَ گریوگ ءَ اَت، آ ھمے ماسٹر اکبال اَت، ادیل ءِ پت ءِ وڈیو اَت۔وھدے ادیل گار ءُ بیگواہ اَت پت ءِ چم ارسیگ اِت اَنت ءُ تُربَت ءَ پدا اھمد چار راہ نشتگ اَت ، گڑا مروچی اے ساہ کندنیں سھت ءُ دمان ءَ آ پت ءِ ھال چی بیت کہ آ وتی ورنائیں بچ ءِ بے سائیں کُنٹ ءِ سرون نند ایت۔
ڈاکٹر شلی بلوچ ءَ گوشتگ کہ بلوچستان چہ اے وڑیں درد چکاریں کسھاں سریچ اِنت کہ ھر لوگ ءَ ترا ماسٹر اکبال ءِ وڑیں بے وسیں پتے دست کپ ایت۔ ھمے دگانی سرا گندگ بیت کہ ھیات ءِ مات ءَ وتی چک ءِ ھشت تیر وارتگیں جون کونڈ ءِ سرا ایر کرتگ ءُ پریات کنگ ءَ اِنت ءُ پدا گندئے کہ ناکو مھراب اِنت گوں وتی نماسگ ءِ بے سائیں کُنٹ ءَ شال ءِ سارتی ءَ درداں ایر بران ءُ پہ انساپ ءَ وداریگ اَت ،بلئے۔ استان ءِ داتگیں ٹپاں ما کدی بے ھال مہ کن ایں بلکیں اے ٹپاں ھشک بوگ ءَ مئیل ایں، ھمینچو اے ٹپاں نوک کت کن ایں ھمینچو مئے دل ءَ پہ استان ءَ کینگ گیش بیت۔
آئی ءَ گوشتگ کہ کیچ ءِ تپتگیں زمین ءِ دلبند ءَ بلوچ ءِ بچ ءِ رتکگیں ھون بے ھال نہ بیت بلکیں ھساب ءَ گیت۔ اے درد چکاریں کسہ بلوچ ءَ را پہ یکجاھی ءَ توار کنگ ءَ اِنت، بیا اِت یکمشت ءُ یکجاہ بہ ایں ءُ وتی باندات ءِ چراگاں رکین ایں۔
