بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که کلات ءُ مستونگ ءَ سے جتائیں اُرشاں زورگریں پاکستانی پوج ءُ وتگڑیں کاونٹر ٹیررازم ڈیمپارٹمنٹ ( سی ٹی ڈی ) ءِ کارمند نشانگ کرتگ انت۔ سرمچاراں مزنیں شھدگ بند کرتگ ءُ سیندک پروجکٹ ءِ گاڑی مانداشتگ اَنت.
آئی ءَ گوشتگ که بی ایل اے ءَ مرچی کلات ءِ ھند کوھک ءَ پاکستانی پوج ءِ کاروانے گوں چیر کرتگیں شورھاں نشانگ کرتگ ، زورگریں پوج ءِ کاروان ءِ سر ءَ هما وهد ءَ اُرش کنگ بیتگ که آ دمگ ءِ ته ءَ په زوراکی ءَ لشکرکشی کنگ ءِ جھد ءَ بیتگ اَنت. تراک ءِ زد ءَ اتکگیں پرپٹ ءِ دو کارمند جاھی مرتگ اَنت ءُ آیانی پرپٹ تباه بیتگ۔
جارکش ءَ گوشتگ که مرچی دیگر ءَ بی ایل اے ءِ سرمچاراں مستونگ ءَ بلوچستان ھوٹل ءِ نزیک ءَ شال کراچی ءِ مزنیں شھدگ بند کرتگ ءُ داں یک اَدارے ءَ پٹ ءُ پول کرتگ ، ھمے میان ءَ سرمچاراں لٹ ءُ پلی سیندک پروجکٹ ءِ دو گاڑی مانداشتگ ءُ تباه کرتگ اَنت۔
آئی ءَ گوشتگ که بی ایل اے ءِ سرمچاراں گوستگیں روچ ءَ مستونگ ءَ کلی دتو ءِ نزیک ءَ وتگڑیں سی ٹی ڈی ءِ کارمند شکیل بنگلزئی گوں آئی ءِ ھمراه ادنان دھوار ءِ ھمراھی ءَ نشانگ کرتگ ءُ کشتگ. شکیل بنگلزئی زورگریں پاکستانی پوج ءِ جوڑ کرتگیں کشنده ٹولی ءِ چریک ھم بیتگ۔
جارکش ءَ گوشتگ که شکیل بنگلزئی مستونگ ءُ کش ءُ کراں زورگریں پوج ءِ کمکارے ءَ گسانی سر ءَ بیڑ برگ ءُ ورناھانی زوریں بیگواھی تچک ءَ هوار بیتگ ، اگست 2022 ءَ مستونگ ءِ هند کلی کاریز سور ءِ جاه منندیں ورنا پرید شاھوانی ءِ زوریں بیگواھی ءَ شکیل ءُ آئه ٹولی ھوار بیتگ. چه ایشی ءَ پد زورگریں پوج ءَ ھمے ورنا اپریل 2023 ءَ چه ائید ءَ یکروچے پیسر شھید کرتگ ءُ آئی لاش چگل داتگ۔
آئی ءَ گوشتگ که چه ایشی ءَ ابید شکیل بنگلزئی سلاه بند کنگ بیتگ ءُ لشکری زوراکیاں زورگریں پوج ءِ ھمراھی ءَ هم ھوار بیتگ۔ شکیل بنگلزئی راجدروھی ءِ میار ءَ بی ایل اے ءِ نشانگ ءَ بیتگ ءُ آ کشتگ ءُ گڈی آسر ءَ سر کرتگ۔
جیھند بلوچ ءَ درشان ءِ گڈی ءَ اے درسیں اُرشانی زمه واری من اتگ۔
