بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ گل ءِ سروک ڈاکٹر ماہ رنگ بلوچ، بنجاھی سروک بیبرگ بلوچ، سبگت اللہ شاہ جی، گل ءِ کارکن گلزادی بلوچ ءُ بیبو بلوچ ءَ ھوار سیاسی کارکن ماما گپار بلوچ ءُ کامریڈ امران بلوچ ءِ درکانودی دزگیری ءَ سے ماہ سرجم بیتگ۔ اے سے ئیں ماھانی میانءَ گل ءِ سر ءَ ریاستی زوراکی برجاہ اَنت، ایشی رد ءَ سرجمیں بلوچستان ءَ سیاسی کارانی سر ءَ بےجاریں پابندی جنگ بیتگ ءُ کانود یک سلاھے ءِ پیم ءَ سیاسی کارکنانی بگیری ءَ کارمرزبوگ ءَ اِنت۔
آئی ءَ گوشتگ کہ ریاست پاکستان ءِ نیمگ ءَ پھازداریں ادارھانی نیمگ ءَ بلوچستان ءَ پہ سیاسی ءُ شرگداری توارانی دارگ ءَ زوراکیانی سیمسر گواز کنگ بیتگ۔ گوستگیں سے ماھانی میان ءَیک نیمگے ءَ سیاسی سروک ءُ کارکنانی زندانی کنگ ءُ سیاسی کارانی سر ءَ پابندی جنگ بیتگ، گڑا دومی نیمگ ءَ بلوچ چکیچینی ءِ پالیسی سکا ترند کنگ بیتگ۔ تھنا اے سے ماھانی میان ءَ درزنانی کچ ءَ بلوچ درکانودی کشگ بیتگ، سدانی کچ ءَ مردم زور بیگواہ کنگ بیتگ، بازیں ھنداں پوجی آپریشنءِ نام ءَ ھندی آبادی پہ زور چہ وتی گساں لڈینگ بیتگ اَنت۔
آئی ءَ گوشتگ کہ ما سرپد بہ ایں ریاستی زوراکیءُ بلوچ سروکانی بندیگ کنگ بلوچ راجی زرمبشت ءَ نہ نزور کنت، نہ سیاسی کارکناں بے توار کنت۔ بلکیں اے زوراکی ءُ ناھکی لس بلوچاں گیشتر یکجاہ ءُ مھکم کنت ءُ آھوکیں وھداں بلوچ راجی زرمبشت سرجمیں دمگ ءَ مھکم ءُ توانمند بیت ءُ دیم ءَ کیت۔ گوں لس مردمانی زورءَ زوراکی ءِ سر ءَ داشتگیں نزام ءَ گوں ھاکاں ھوار کنگ بیت۔
آئی ءَ گوشتگ کہ بلوچ یکجھتی کمیٹی وتی درسیں کارکنان ھمے کلوہ ءَ دنت کہ وتی جھد ءَ مھکم بہ کن اِنت، گس گس ءَ ھیلکاری تکشام بندات بہ کن اِت، لس بلوچاں بی وائی سی ءِ راھبند ءِ سر ءَ یکجاہ بہ کن اِت، لس مردمانی زور ءَ گوں گل ءِ زور ءَیکجاہ کن اِت، جھان ءِ چونیں ھم توانمندیں ریاست ءُ زوراکیں نزام لس مردمانی زور ءَپروش دات نہ کنت۔
