چہ ھزدار ءَ پاکستانی چیریں ادارھانی دست ءَ بیگواہ کنگ بیتگیں ورنا آبد ازیز ءِ کھول ءَ پریس کانپریس کرتگ ءُ گوشتگ کہ دو روچ پیش 13 جون 2025 ءَ منی کستریں برات آبدازیز ء ابدالزیز کہ بالینہ کھٹان ءِ جاہ منند اِنت آ بلوچستان زانشتجاہ پشین کیمپس ءِ کانود ءِ نودربر اِنت۔چہ پاکستانی لشکری ادارھانی نیمگ ءَ بیگواہ کنگ بیتگ۔
آئی ءَ گوشتگ کہ آبد وتی برات ءِ ھمراھی ءَ چہ الامہ مھمد اُمر دینپوری کتابجاہ ءَ واتر گس ءِ نیمگ ءَ آھگ ءَ بیتگ کہ نکاپ پوشیں سلاہ بندیں مردماں یک اسپتیں کرولا گاڑی یے گوں بیت آبد آزار دیگ ءَ پد چہ سرجمیں بازار ءِ مردمانی دیم ءَ آوار جتگ۔
آئی ءَ گوشتگ کہ چہ آبد ءِ زوریں بیگواھی ءَ مئے کھول جنجالانی دیمپان ایں۔ ما ھمے لوٹ ءَ کن ایں کہ زوریں بیگواھیانی درچ بند کنگ بہ بیت۔ اے درد ءَ کہ ما اوپار کنگ ءَ ایں ھچ کھول اے درد ءِ دیمپان بوگ نہ لوٹ ایت۔ما ھمے اوست ءَ دار ایں کہ مئے توار گوش دارگ به بیت۔
آئی ءَ گوشتگ کہ ما چہ وتی کھول ءِ نیمگ ءَ ھمے لوٹ ءَکن ایں درسیں انسانی ھکانی ادارہ، میان استمانی رسانکدر، سول سوسائٹی ءُ پاکستان ءِ آمیدگس پہ مئے برات آبد ءِ زوتیں آجوئی ءَ وتی کرد ءَ پیلو بہ کن اَنت۔
آئی ءَ گوشتگ کہ داں بیست ءُ چار ادار ءَ آبد ازیز آجو نہ بوت ما کانود ءِ رد ءَ زھرشانی کن ایں۔
