بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ ماں رسانکدر ءَ بیست ءُ ھشت مئی ءِ درگتءَ وتی شنگ کرتگیں درشانے ءَ گوشتگ کہ بیست ءُ ھشت مئی پہ بلوچستان ءَ سیاھی روچے۔ 28 ھشت مئی 1998 ءَ پاکستان ءَ بلوچستان ءِ کوھی دمگ چاگے ءَ وتی ایٹمی سلاہ چکاس اتگ اَنت۔ وھدے پاکستان اے روچ ءَ ” یوم تکبر ” ءِ روچ ءِ درگت ءَ دار ایت ءُ یک پھر ءُ شان ءِ روچے گوش ایت، بلے پہ بلوچ راج ءَ سیاھیں روچے۔
آئی ءَ گوشتگ کہ پاکستان ءَ بلوچستان ءِ سرڈگار پہ وتی ایٹمی ناشریاں کارمرز کرتگ ءُ ایشی مستریں نھاد ما بلوچستاں پیلو کرتگ۔ چہ آ روچ ءَ پد چاگے ءُ آئی کِر ءُ کشانی لس مردم شومک، سِل ءِ نادراھی، بے اولادی، چہ ودی بوگ ءَ پیش بازیں نادراھیانی آماچ اَنت۔مولی تباھیاں زندمان جنجال کرتگ۔ ساپیں آپ ھم زھرہ بیتگ اَنت۔ زندمان ڈکال ءُ نادراھی ءِ آماچ اِنت۔
ڈاکٹر نسیم بلوچ ءَ گوشتگ کہ اے زوراکی ءُ نوک آبادکاری گامگیجے بیتگ۔ پاکستان ریاست بلوچستان ءَ یک چکاس جاھے سرپد بیت ءُ لس بلوچاں دیمونی ءِ مال۔ بیست ءُ ھشت مئی پما پھر ءِ روچے نہ اِنت۔ اے روچ مارا ھمے ترانگ ءَ گیج ایت کہ پاکستان گوں بلوچ ءَ چینچو زوراکی کنگ ءَ اِنت۔ بلوچستان آجو بہ بیت ھم اے گوستانک ءِ تہ ءَ پہ مئے راج ءَ سیاھیں روچے زانگ بیت۔
