ھب چوکی: بوانی ءَ زور بیگواھیں مردمانی کھول ءُ ھب انتزامیہ ءِ میان ءَ گپ ءُ تران بے سوب بیتگ ءُ زھرشانی نندانک سیمی روچ ءَ ھم برجاہ اِنت۔
اے بابت ءَ بی وائی سی کراچی ھنکین ءَ ماں رسانکدر ءَ وتی شنگ کرتگیں جارے ءَ گوشتگ کہ اے وھد ءَ بوانی ءَ سیمی روچ ءَ زھرشانی نندانک برجاہ اِنت۔ ریاستی ٹولی ایس ایس پی ھب پہ گپ ءُ تران ءَ اتکگ بلے گپ ءُ تران بے سوب بیتگ۔
آئی ءِ گوشگ اِنت کہ ھالانی رد ءَ انتزامیہ مئے سر ءَ پہ ارش کنگ ءَ جیڑگ ءَ اِنت۔ مارا ھمے ھال سر بیتگ کہ پولیس ءُ ایپ سی بازیں کچے ءَ دیم پہ نندانک جاہ ءِ نیمگ ءَ آھگی اَنت۔ ما نزیکیں ھنداں جاہ منندیں درسیں مردمانی گون ءَ لوٹ کن ایں کہ مئے کمک ءَ بہ کن اَنت۔
آئی ءَ گوشتگ کہ مئے نندانک انگت ءَ ھما جاہ ءَ برجاہ اِنت۔
