ھزدار: کشندہ ٹولی ءِ کارمندانی دست ءَ آوار جنگ بیتگیں اسمہ بلوچ ءِ برات اتا اللہ جتک ءَ گوشتگ کہ منی گھار ءِ تامربند پہ زور گرگ بیتگ ما ءُ بلوچ راج ایشی ءَ رد کن ایں۔ اے وڑیں تامربند ءِ جوڑ کنگ مئے زھرشانی ءِ نزور کنگ ءِ جھد اِنت دانکہ مردم مئے زھرشانی ءِ پلہ مرزی ءَ مہ کن اَنت۔
اتا اللہ ءَ گوشتگ کہ چہ اے تامربند ءِ شنگ بیگ ءَ پد پہ ریاستی ادارہ ءُ سرکار ءَ اے نیمون پشت نہ کپتگ کہ مامیاربار ءِ بابت ءَ سرپد نہ ایں۔
آئی ءَ گوشتگ کہ چہ کجام اکاونٹ ءَ درساں پیش اے تامربند شنگ بیتگ ھمیشی کمک ءَ میاربار زانگ ءُ دزگیر کنگ بنت۔ اگاں چہ ایشی ءَ ابید سرکار ءَ کاروائی نہ کرت ءُ اسمہ جتک آجو نہ کرت گڑا ایشی بزانت ھمے بیت کہ انتزامیہ وت میارباراں کمک کنگ ءَ اِنت۔
اتا اللہ ءَ گوشتگ دانکہ منی گھار آجو کنگ ءُ آوارجنگ ءِ زمہ وار سزا دیگ نہ بیتگ اَنت مئے زھرشانی نندانک برجاہ بیت ءُ ما وتی زھرشانی ءَ گیش ترند ءُ دراجکش کن ایں، ھچ وڑ ءَ پشت ءَ نہ رو ایں۔
