شال: وی بی ایم پی ءِ سرکماش نسراللہ ءَ ماں رسانکدر ءَ وتی شنگ کرتگیں درشانے ءَ گوشتگ کہ زوربیگواھیں سابر پرکانی ءِ کھول ءَ آئی بیگواھی ءِ کیس گل ءِ کرا یاداشت کرتگ۔
آئی گوشتگ کہ زوربیگواھیں سابر ءِ برات بشیر اھمد گوشتگ کہ منی برات سابر پرکانی ء ھدا داد ءَ سی ٹی ڈی ءَ 27 نومبر 2024 ءَ شپ ءِ ادار یک ءُ نیم ءَ گاھی ھان سریاب ءِ چہ آئی گس ءَ آوار جتگ ءُ بیگواہ کرتگ کہ انگت آئی بابت مارا ھچ وڑیں سرپدی دیگ نہ بوتگ۔ چہ آئی بیگواھی ءِ سوب ءَ کھول بازیں جنجالانی دیمپان اِنت۔
نسراللہ ءَ گوشتگ کہ بشیر اھمد ءَ گل ءَ دلجمی داتگ کہ سابر پرکانی ءِ کیس ءَ سرکار ءِ نیمگ ءَ جوڑ کرتگیں زور بیگواھیں مردمانی کمیشن ءَ سر کنت ءُ پہ آئی آجوئی ءَ ھر جاہ ءَ توار چست کنت۔
آئی گوشتگ کہ وی بی ایم پی سابر. اھمد ءِ زوربیگواھی ءَ ایر جنت ءُ چہ سرکار ءَ لوٹ کنت کہ سابر اھمد ءِ سر ءَ چونیں بھتامے ھست آئی ءَ آمیدگس ءَ پیش بہ کنت۔ اگاں آ بے میار اِنت گڑا زوت آجو کنگ ءُبہ بیت ءُ آئی کھول ءَچہ اے جنجلاں بہ رکّین ایت۔
